ലോസ്ഏഞ്ചൽസ്: ലോസ്ഏഞ്ചൽസിൽ കാലാവസ്ഥ മെച്ചപ്പെടുകയാണെന്ന് അഗ്നിരക്ഷാ സേന. കാട്ടൂതീ അണയ്‌ക്കാനുള്ള ശ്രമങ്ങൾ നടന്നുവരികയാണെന്നും ആളിപ്പടരുന്ന തീ പൂർണമായും നിയന്ത്രണ വിധേയമാക്കാൻ ഇനിയും സമയമെടുക്കുമെന്നും അഗ്നിരക്ഷാ സേന അറിയിച്ചു.
കാലാവസ്ഥ അനുകൂലമായി വന്നതോടെ കാട്ടൂതീയുടെ ഭയാനകമായ സ്ഥിതിക്ക് മാറ്റം വന്നിട്ടുണ്ട്. തീ പൂർണമായും അണയ്‌ക്കാനുള്ള ശ്രമങ്ങൾ നടന്നുവരികയാണ്. കഴിഞ്ഞ ദിവസങ്ങളിൽ ഉഷ്ണകാറ്റ് വർദ്ധിച്ചതിനാൽ കാട്ടുതീ പെട്ടെന്ന് പടരുന്ന സാഹചര്യമായിരുന്നു ഉണ്ടായിരുന്നത്. എന്നാൽ ഈ കാലാവസ്ഥയിൽ മാറ്റമുണ്ടെന്നാണ് അഗ്നിരക്ഷാ സേന നൽകുന്ന റിപ്പോർട്ടിൽ നിന്ന് വ്യക്തമാവുന്നത്.
ഉഗ്രശബ്ദത്തോടെ പടരുന്ന കാട്ടുതീ ഭയാനകമായ അന്തരീഷമാണ് സൃഷ്ടിക്കുന്നത്. ഇരുനില കെട്ടിടങ്ങളുടെ ഉയരത്തിൽ ആളിപ്പടരുന്ന കാട്ടുതീ അണയ്‌ക്കാനുള്ള ശ്രമത്തിലാണ് അഗ്നിരക്ഷാ സേന.
കാട്ടുതീ ഭയന്ന് പ്രാണരക്ഷാർത്ഥം ഓടിയവരൊക്കെ തിരികെ എത്താൻ തുടങ്ങിയിട്ടുണ്ട്. കത്തിചാമ്പലായി കിടക്കുന്ന കെട്ടിടങ്ങളും വീടുകളും കണ്ട് ദുഃഖിതരായാണ് ആളുകൾ സ്ഥലത്ത് നിന്ന് മടങ്ങുന്നത്. തീ കത്തുന്ന സ്ഥലത്തേക്ക് ഒരാഴ്ച വരെ ആരും പ്രവേശിക്കരുതെന്ന് ഫയർഫോഴ്സ് അറിയിച്ചു.
40,000 ഏക്കർ സ്ഥലത്താണ് കാട്ടുതീ വ്യാപിച്ചത്. 20,000 കെട്ടിടങ്ങളും വീടുകളും കത്തിചാരമായി. പൂർണമായും നിയന്ത്രണ വിധേയമായിട്ടില്ലെങ്കിലും മറ്റ് മേഖലകളിലേക്ക് തീ പടരുന്നില്ല എന്ന ആശ്വാസത്തിലാണ് അഗ്നിരക്ഷാ സേന.
ലോസ്ഏഞ്ചൽസിൽ 50 മില്യൺ ഡോളറിന്റെ നാശനഷ്ടങ്ങളാണ് റിപ്പോർട്ട് ചെയ്തിരിക്കുന്നത്. അതേസമയം, 80,000 ത്തിലധികം ആളുകളോട് മാറി താമസിക്കാൻ അധികൃതർ നിർദേശം നൽകിയിട്ടുണ്ട്.
