തിരുവനന്തപുരം: നെയ്യാറിൽ ദമ്പതികളുടെ മൃതദേഹങ്ങൾ കണ്ടെത്തി. തിരുവനന്തപുരം മുട്ടട സ്വദേശികളായ സ്നേഹദേവ്, ഭാര്യ ശ്രീകല എന്നിവരുടെ മൃതദേഹങ്ങൾ കണ്ടെത്തിയത്. ഇവരുടെ കാര് അരുവിപ്പുറം ക്ഷേത്രത്തിന് സമീപത്ത് നിന്ന് കണ്ടെത്തി. കാറിൽ നിന്നും നാല് പേജുള്ള ആത്മഹത്യ കുറിപ്പും കണ്ടെടുത്തിട്ടുണ്ട്.
മകന് മരിച്ചതില് മനം നൊന്ത് ആത്മഹത്യ ചെയ്യുന്നുവെന്നാണ് കുറിപ്പില് എഴുതിയിരിക്കുന്നത്. ഒരു വര്ഷം മുന്പാണ് ഇവരുടെ ഏകമകന് മരിച്ചത്. മകന്റെ വേര്പാട് ജീവിതത്തില് തീരാവേദനയായെന്നാണ് കുറിപ്പിൽ പറയുന്നത്
ഇന്നലെ വൈകുന്നേരം ഇവർ നദിയിൽ ചാടിയെന്നാണ് നിഗമനം. ഇവരുടെ ചെരിപ്പുകളും സമീപത്ത് നിന്ന് ലഭിച്ചു. ഇന്ന് രാവിലെ നാട്ടുകാരാണ് മൃതദേഹങ്ങൾ കണ്ടെത്തിയത്. വലിയവിളാകം കടവിൽ കൈകൾ തമ്മിൽ കെട്ടിയ നിലയിലായിരുന്നു മൃതദേഹങ്ങൾ. ഫയർഫോഴ്സ് എത്തിയാണ് മൃതദേഹങ്ങൾ കരയ്ക്കെത്തിച്ചത്.
