വാഷിംഗ്ടൺ: പ്രധാനമന്ത്രി നരേന്ദ്ര മോദിയെ പ്രശംസിച്ച് യുഎസ് പ്രസിഡന്റ് ഡൊണാൾഡ് ട്രംപ്. മോദി ഒരു മികച്ച സുഹൃത്താണെന്നും വളരെ ബുദ്ധിയുള്ള മനുഷ്യനെന്നനും ട്രംപ് പറഞ്ഞു. അതേസമയം ഇന്ത്യക്കെതിരെ ഉയർന്ന തീരുവ ചുമത്താനുള്ള തന്റെ നിലപാട് യുഎസ് പ്രസിഡന്റ് ആവർത്തിച്ചു. ഇന്ത്യൻ ഉൽപ്പന്നങ്ങൾക്ക് പരസ്പര തീരുവ ഏർപ്പെടുത്തണമെന്ന് തന്റെ ഭരണകൂടം സമ്മർദ്ദം ചെലുത്തുന്നുണ്ടെങ്കിലും, ഇരു രാജ്യങ്ങളും തമ്മിലുള്ള വ്യാപാര ചർച്ചകൾ നല്ല ഫലങ്ങൾ നൽകുമെന്ന് വൈറ്റ് ഹൗസിൽ മാദ്ധ്യമ പ്രവർത്തകരോട് സംസാരിച്ച ട്രംപ് ആത്മവിശ്വാസം പ്രകടിപ്പിച്ചു.
“പ്രധാനമന്ത്രി മോദി അടുത്തിടെയാണ് ഇവിടെ വന്നത്, ഞങ്ങൾ എപ്പോഴും വളരെ നല്ല സുഹൃത്തുക്കളായിരുന്നു. ലോകത്തിലെ ഏറ്റവും ഉയർന്ന തീരുവ ചുമത്തുന്ന രാജ്യങ്ങളിലൊന്നാണ് ഇന്ത്യ… അവർ വളരെ മിടുക്കരാണ്,” ട്രംപ് പറഞ്ഞു. “അദ്ദേഹം വളരെ മിടുക്കനായ മനുഷ്യനും എന്റെ ഒരു നല്ല സുഹൃത്തുമാണ്. ഞങ്ങൾ വളരെ നല്ല ചർച്ചകൾ നടത്തി. ഇന്ത്യയ്ക്കും നമ്മുടെ രാജ്യത്തിനുമിടയിൽ കാര്യങ്ങൾ വളരെ നന്നായി നടക്കുമെന്ന് ഞാൻ കരുതുന്നു. നിങ്ങൾക്ക് ഒരു മികച്ച പ്രധാനമന്ത്രിയുണ്ടെന്ന് ഞാൻ പറയാൻ ആഗ്രഹിക്കുന്നു.” ട്രംപ് പറഞ്ഞു.
അതേസമയം ഫെബ്രുവരി മുതൽ, താരിഫുകളെച്ചൊല്ലിയുള്ള പിരിമുറുക്കങ്ങൾ ലഘൂകരിക്കുക എന്ന ലക്ഷ്യത്തോടെ, യുഎസുമായുള്ള വ്യാപാര ബന്ധം ശക്തിപ്പെടുത്തുന്നതിന് ഇന്ത്യ ഗണ്യമായ നടപടികൾ കൈക്കൊണ്ടിട്ടുണ്ട്. യുഎസിൽ നിന്നുള്ള ഊർജ്ജ വാങ്ങലുകൾ കഴിഞ്ഞ വർഷം 15 ബില്യൺ ഡോളറിൽ നിന്ന് 25 ബില്യൺ ഡോളറായി ഉയർത്താൻ ഇന്ത്യ തീരുമാനിച്ചിരുന്നു. ട്രംപിന്റെ വിമർശനത്തിന് മറുപടിയായി, ഇന്ത്യ പ്രധാന ഇറക്കുമതികളുടെ തീരുവ കുറച്ചു, ബർബൺ വിസ്കി താരിഫ് 150 ശതമാനത്തിൽ നിന്ന് 100 ശതമാനമായി കുറച്ചു. സർക്കാരിന്റെ ഫെബ്രുവരി ബജറ്റ് ആഡംബര കാറുകൾ, സോളാർ സെല്ലുകൾ, യന്ത്രങ്ങൾ എന്നിവയുടെ അടിസ്ഥാന കസ്റ്റംസ് തീരുവ കുറച്ചു, പീക്ക് ഇറക്കുമതി താരിഫ് 70 ശതമാനമായും ശരാശരി താരിഫ് 11 ശതമാനത്തിൽ താഴെയുമായി കുറച്ചു.
