അഹമ്മദാബാദ്: രാജ്യത്തെ നടുക്കിയ വിമാനദുരന്തത്തിൽ ജീവൻ നഷ്ടമായവരിൽ വിദേശവിനോദ സഞ്ചാരികളും. അപകടത്തിന് തൊട്ടുമുമ്പ് യുകെ പൗരനായ ജാമി മീക്ക് ഇൻസ്റ്റഗ്രാമിൽ പങ്കുവച്ച വീഡിയോ ഏവരുടെയും ഉള്ളുലയ്‌ക്കുന്നതാണ്. ഗുജറാത്ത് സന്ദർശനം പൂർത്തിയാക്കി മടങ്ങുമ്പോഴാണ് അപ്രതീക്ഷിത അപകടമുണ്ടായത്.
കഴിഞ്ഞ ദിവസം രാത്രി ഇന്ത്യ സന്ദർശിച്ചതിനെ കുറിച്ചുള്ള വിശേഷങ്ങൾ യുവാവ് ഇൻസ്റ്റഗ്രാമിലൂടെ പങ്കുവച്ചിരുന്നു. വിമാനം പുറപ്പെടുന്നതിന് മുമ്പും ജാമി വീഡിയോ പങ്കുവച്ചു. ’ഗുഡ് ബൈ ഇന്ത്യ’ എന്നായിരുന്നു ജാമിയുടെ അവസാനത്തെ പോസ്റ്റ്. ഒരു സുഹൃത്തിനോടൊപ്പമാണ് ജാമി ഇന്ത്യയിലെത്തിയത്.
“ഇന്ത്യയിലെ ഞങ്ങളുടെ അവസാന രാത്രിയാണിത്. ഇത് ശരിക്കും മനോഹരമായ അനുഭൂതിയായിരുന്നു. മനസിനെ നൊമ്പരപ്പെടുത്തുന്ന ചില കാര്യങ്ങളും ഉണ്ടായിട്ടുണ്ട്. ഇതെല്ലാം ഒരുമിച്ച് ചേർത്ത് ഒരു വ്ലോഗ് തയാറാക്കും”. ഗുജറാത്തിലെ സ്വാദിഷ്ടമായ ആഹാരവിഭവത്തെ കുറിച്ചും ജാമി പോസ്റ്റിൽ കുറിക്കുന്നുണ്ട്.
വിമാനത്താവളത്തിൽ നിന്നും യുവാക്കൾ വീഡിയോ എടുക്കുന്നുണ്ട്. ലണ്ടനിലേക്ക് പോകാൻ പോവുകയാണെന്നും 10 മണിക്കൂർ നീണ്ട യാത്രയാണെന്നും പറഞ്ഞാണ് ഇരുവരും വീഡിയോ അവസാനിപ്പിക്കുന്നത്.
