തിരുവനന്തപുരം: കനത്ത മഴയെത്തുടര്ന്ന് തിരുവനന്തപുരത്ത് പലയിടങ്ങളിലും വെള്ളക്കെട്ട് രൂപപ്പെട്ടു. തമ്പാനൂര്, ചാക്ക, ചാല, ശ്രീകണ്ഠേശ്വരം, കിംസ് ആശുപത്രി പരിസരം തുടങ്ങിയ മേഖലകളിലാണ് രൂക്ഷമായ വെള്ളക്കെട്ടുണ്ടായത്. ഇന്ന് നഗരത്തില് മഴയ്ക്ക് നേരിയ ശമനമു ണ്ടായപ്പോൾ നീർവാർച്ച ഉണ്ടായെങ്കിലും പലയിടങ്ങളിലും വെള്ളക്കെട്ട് പൂർണ്ണമായി ഒഴിഞ്ഞിട്ടില്ല. തിരുവനന്തപുരം ജില്ലയുടെ മലയോരമേഖലകളില് കനത്തമഴ തുടരുകയാണ് എന്നാണ് റിപ്പോർട്ട് . മഴയെത്തുടര്ന്ന് ജില്ലയിലെ വിദ്യാഭ്യാസ സ്ഥാപനങ്ങള്ക്ക് വെള്ളിയാഴ്ച അവധി പ്രഖ്യാപിച്ചിരുന്നു.
പൊന്മുടി ഇക്കോ ടൂറിസം കേന്ദ്രം വെള്ളിയാഴ്ച മുതല് അടച്ചിടാന് തിരുവനന്തപുരം ഡിവിഷണല് ഫോറസ്റ്റ് ഓഫീസര് നിര്ദേശം നല്കി. ഇനിയൊരു നിര്ദേശമുണ്ടാകുന്നതുവരെ ഇക്കോ ടൂറിസം കേന്ദ്രം അടച്ചിടാനാണ് ഉത്തരവ്.
മലയോരമേഖലകളില് ഉള്വനത്തില് മഴ ശക്തമായി പെയ്യുകയാണ് എന്നതിന്റെ സൂചന നൽകിക്കൊണ്ട് വാമനപുരം നദിയില് നീരൊഴുക്ക് വര്ധിച്ചു. ഈ രീതിയില് മഴ തുടര്ന്നാൽ മണ്ണിടിച്ചിലിനു സാധ്യതയുണ്ട്. ജലനിരപ്പ് ഉയരുന്ന സാഹചര്യത്തില് അരുവിക്കര ഡാമിന്റെ ഷട്ടറുകള് ഉയര്ത്തി. 15 സെന്റിമീറ്റര് വീതമാണ് ഷട്ടറുകള് ഉയര്ത്തിയത്.തുടർന്ന് ഡാമിന്റെ സമീപപ്രദേശങ്ങളില് താമസിക്കുന്നവര് ജാഗ്രത പാലിക്കണമെന്ന് ജില്ലാ കളക്ടര് അറിയിച്ചു.
