പനാജി: ദേശീയോദ്ഗ്രഥനം ലക്ഷ്യമിട്ടുള്ള കേന്ദ്ര സർക്കാരിന്റെ ‘ഏക് ഭാരത് ശ്രേഷ്ഠ ഭാരത്’ പദ്ധതിയുടെ ഭാഗമായി കൊച്ചിയിൽ നിന്നുള്ള മാധ്യമസംഘത്തിന്റെ ഗോവ പര്യടനം പുരോഗമിക്കുന്നു . കേരളവും ഗോവയും തമ്മിലുള്ള സാംസ്കാരിക വിനിമയവും വികസന കാഴ്ചപ്പാടുകളും പങ്കുവെക്കുന്നതിനായി സംഘടിപ്പിച്ച നാല് ദിവസത്തെ സന്ദർശനത്തിനായാണ്13 അംഗ സംഘം എത്തിയത്. ഗോവയിലെ വിവിധ കേന്ദ്ര സർക്കാർ സ്ഥാപനങ്ങളുടെയും വികസന പദ്ധതികളുടെയും പ്രവർത്തനങ്ങൾ സംഘം നേരിട്ട് വിലയിരുത്തുകയാണ്.
കേന്ദ്ര വാർത്താ വിതരണ പ്രക്ഷേപണമന്ത്രാലയത്തിന് കീഴിലുള്ള പി ഐ ബി കൊച്ചിയുടെ നേതൃത്വത്തിലാണ് വിവിധ കേന്ദ്രസർക്കാർ സ്ഥാപനങ്ങൾ ഗോവയിൽ മാധ്യമസംഘം സന്ദർശിക്കുന്നത്. പിഐബി ഗോവ വിവിധ സന്ദർശനങ്ങൾക്ക് നേതൃത്വം നൽകുന്നു.
ഫെബ്രുവരി 24 മുതൽ 27 വരെയാണ് സന്ദർശനം. കേന്ദ്ര സർക്കാരിന്റെ വിവിധ പ്രമുഖ സ്ഥാപനങ്ങളും ഗവേഷണ പദ്ധതികളുടെ പ്രവർത്തനരീതി, വരാനിരിക്കുന്ന പുതിയ സംരംഭങ്ങൾ, ഗവേഷണ മേഖലയിലെ പുരോഗതി എന്നിവയെക്കുറിച്ച് നേരിട്ട് മനസ്സിലാക്കുക എന്നതാണ് ഈ യാത്രയുടെ പ്രധാന ലക്ഷ്യം.
ഗോവ മുർമുഗാവോ പോർട്ട്, ഗോവ ഷിപ്പിയാർഡ്, ഇന്ത്യൻ ഇൻസ്റ്റ്യൂട്ട് ഓഫ് കോസ്റ്റൽ അഗ്രികൾച്ചറൽ റിസർച്ച്, നാഷണൽ ഇൻസ്റ്റ്യൂട്ട് ഓഫ് വാട്ടർ സ്പോർട്സ് എന്നിവിടങ്ങളിൽ മാധ്യമസംഘം ഇതുവരെ സന്ദർശനം നടത്തി. സ്ഥാപന മേധാവികൾ പ്രവർത്തന രീതികൾ, ഗവേഷണ പദ്ധതികൾ എന്നിവയെല്ലാം വിശദീകരിച്ചു .
സംസ്ഥാനങ്ങൾ തമ്മിലുള്ള ബന്ധം സുദൃഢമാക്കുന്നതിനൊപ്പം, കേന്ദ്രാവിഷ്കൃത പദ്ധതികൾ ജനങ്ങളിലേക്ക് എത്തിക്കുന്നതിൽ മാധ്യമങ്ങളുടെ പങ്കും ഈ സന്ദർശനത്തിലൂടെ ചർച്ചയാകും. നാല് ദിവസം നീണ്ടുനിൽക്കുന്ന പര്യടനത്തിന് ശേഷം 27-ാം തീയതിയോടെ സംഘം കേരളത്തിലേക്ക് മടങ്ങും.
