കണ്ണൂര്‍: കണ്ണാടിപ്പറമ്പ് ധര്‍മശാസ്താ ക്ഷേത്രോത്സവത്തിനിടെ ആന ഇടഞ്ഞോടിയത് നാടിനെ മണിക്കൂറുകളോളം ഭീതിയിലാഴ്‌ത്തി. ഇന്നലെ രാത്രി 11 മണിയോടെയാണ് സംഭവം. അഞ്ച് കിലോമീറ്ററോളം വിരണ്ടോടിയ ആന നിരവധി വാഹനങ്ങള്‍ തകര്‍ത്തുവെങ്കിലും വന്‍ ദുരന്തം ഒഴിവായത് ആശ്വാസമായി. ഓലയമ്പാടിയില്‍ നിന്ന് എത്തിച്ച ‘കര്‍ണന്‍’ എന്ന ആനയാണ് വിരണ്ടത്.
രാത്രി 10.30-ഓടെ എഴുന്നള്ളത്ത് കഴിഞ്ഞ് ക്ഷേത്രപരിസരത്ത് തളച്ചതിന് പിന്നാലെയാണ് ആന അക്രമാസക്തനായത്. പരിഭ്രാന്തനായി ഓടിയ ആന ക്ഷേത്രമുറ്റത്ത് നിര്‍ത്തിയിട്ടിരുന്ന രണ്ട് കാറുകളും ഓട്ടോറിക്ഷകളും കുത്തിമറിച്ചു. മറ്റ് ചില വാഹനങ്ങള്‍ക്കും കേടുപാടുകള്‍ സംഭവിച്ചു. ക്ഷേത്രപരിസരത്തുനിന്നും കണ്ണാടിപ്പറമ്പ് ടൗണ്‍, നെടുവാട്ട്, സ്റ്റെപ്പ് റോഡ് വഴി കാട്ടാമ്പള്ളി മെയിന്‍ റോഡിലേക്കാണ് ആന ഓടിയത്. ഉത്സവത്തിനെത്തിയ നൂറുകണക്കിന് ആളുകള്‍ക്കിടയിലൂടെ ആന വിരണ്ടോടിയത് വലിയ പരിഭ്രാന്തി പരത്തി. ജനങ്ങള്‍ ചിതറിയോടിയെങ്കിലും ആര്‍ക്കും പരിക്കേറ്റതായി റിപ്പോര്‍ട്ടില്ല.
ഏകദേശം അഞ്ച് കിലോമീറ്റര്‍ ദൂരം പിന്നിട്ട് നാറാത്ത് ആലിന്‍കീഴിന് സമീപം നിലയുറപ്പിച്ച ആനയെ പാപ്പാന്മാരും നാട്ടുകാരും ചേര്‍ന്ന് ഏറെ പരിശ്രമിച്ചാണ് ശാന്തനാക്കിയത്. പുലര്‍ച്ചെ 12 മണിയോടെ ആനയെ പൂര്‍ണ്ണമായും തളയ്‌ക്കാന്‍ സാധിച്ചു. അപകടകരമായ സാഹചര്യം ഒഴിവായതോടെ ക്ഷേത്രപരിസരത്തെയും നാട്ടിലെയും ആശങ്കയ്‌ക്ക് അറുതിയായി.
