തിരുവനന്തപുരം: നേമം മണ്ഡലത്തിന്റെ സമഗ്ര വികസനത്തിനായി കൃത്യമായ കാഴ്ചപ്പാടും നിശ്ചയദാര്ഢ്യവുമായി ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര്. വെറുമൊരു എംഎല്എ പദവിക്കായല്ല, മറിച്ച് പതിറ്റാണ്ടുകളായി നേമം കാത്തിരിക്കുന്ന യഥാര്ത്ഥ മാറ്റം കൊണ്ടുവരാനാണ് താന് മത്സരിക്കുന്നതെന്ന് അദ്ദേഹം വ്യക്തമാക്കി.
ഒരു ജനപ്രതിനിധിയുടെ യഥാര്ത്ഥ ഉത്തരവാദിത്തം എന്താണെന്ന് പ്രവര്ത്തിച്ചു കാണിക്കാനുള്ള വാശിയാണ് തനിക്കുള്ളത്. തന്റെ വാക്കുകള് വെറും തെരഞ്ഞെടുപ്പ് വാഗ്ദാനങ്ങളല്ല, മറിച്ച് നടപ്പിലാക്കുമെന്ന് ഉറപ്പുള്ള ‘മോദി ഗ്യാരന്റി’യുടെ ഭാഗമാണെന്ന് അദ്ദേഹം ഓര്മ്മിപ്പിച്ചു. വോട്ടിനായി എസ്.ഡി.പി.ഐയുടെയും ജമാഅത്തെ ഇസ്ലാമിയുടെയും കാലുപിടിക്കുന്ന മുന്നണികളുടെ രാഷ്ട്രീയത്തിന് അറുതി വരുത്തണമെന്നും അദ്ദേഹം ആഹ്വാനം ചെയ്തു.
കേരളത്തിലെ വോട്ടര്മാരെ കബളിപ്പിക്കാന് ക്ഷേമ പെന്ഷന് വാഗ്ദാനങ്ങളുമായി എത്തിയ എല്ഡിഎഫിനും യുഡിഎഫിനും നേമത്ത് തിരിച്ചടി നേരിടുമെന്ന് രാഷ്ട്രീയ നിരീക്ഷകര് കരുതുന്നു. 2021-ല് നല്കിയ 2500 രൂപ പെന്ഷന് വാഗ്ദാനം പോലും നടപ്പാക്കാന് കഴിയാത്ത പിണറായി സര്ക്കാര്, ഇപ്പോള് 3000 രൂപയാക്കുമെന്ന് പറയുന്നത് ജനങ്ങളെ പരിഹസിക്കുന്നതിന് തുല്യമാണ്. ഇത് എല്ഡിഎഫിനെ കടുത്ത പ്രതിരോധത്തിലാക്കിയിട്ടുണ്ട്. പെന്ഷന് അവകാശമാണെന്ന് ഇപ്പോള് പറയുന്ന യുഡിഎഫ്, കഴിഞ്ഞ കാലങ്ങളില് ജനക്ഷേമ കാര്യങ്ങളില് കാണിച്ച അലംഭാവം ജനങ്ങള് മറന്നിട്ടില്ല.
ക്ഷേമ പെന്ഷന്റെ പേരില് ഇടതു-വലതു മുന്നണികള് നടത്തുന്ന വാഗ്ദാന ലംഘനങ്ങള്ക്ക് മറുപടിയായി, കേന്ദ്രസര്ക്കാര് മാതൃകയിലുള്ള സുസ്ഥിരമായ വികസനവും തൊഴിലവസരങ്ങളും നേമത്ത് യാഥാര്ത്ഥ്യമാക്കാനാണ് ബിജെപി ലക്ഷ്യമിടുന്നത്. പ്രധാനമന്ത്രിയുടെ വികസന പന്ഥാവിലേക്ക് നേമത്തെ നയിക്കാന് രാജീവ് ചന്ദ്രശേഖറിന്റെ സ്ഥാനാര്ത്ഥിത്വം കരുത്തുപകരുമെന്നാണ് മണ്ഡലത്തിലെ പൊതുവികാരം.
