ന്യൂഡല്ഹി: ആഗോളതലത്തില് യുദ്ധസമാനമായ സാഹചര്യങ്ങള് നിലനില്ക്കെ, ഇന്ത്യയുടെ തന്ത്രപ്രധാന മേഖലകള്ക്ക് കരുത്തുപകരുന്ന സുപ്രധാന വാഗ്ദാനങ്ങളുമായി റഷ്യ. ഇന്ത്യയുമായുള്ള വ്യാപാര-ഊര്ജ്ജ ബന്ധം കൂടുതല് ശക്തമാക്കുന്നതിന്റെ ഭാഗമായി കൂടുതല് ക്രൂഡ് ഓയിലും പ്രകൃതിവാതകവും നല്കാന് തയ്യാറാണെന്ന് റഷ്യ അറിയിച്ചു. റഷ്യന് ഉപപ്രധാനമന്ത്രി ഡെനിസ് മാന്തുറോവ് പ്രധാനമന്ത്രി നരേന്ദ്ര മോദിയുമായി നടത്തിയ കൂടിക്കാഴ്ചയിലാണ് ഇന്ത്യയ്ക്ക് ഏറെ ഗുണകരമായ ഈ തീരുമാനങ്ങള് ഉണ്ടായത്.
ഇസ്രായേല്-ഇറാന് സംഘര്ഷങ്ങളെത്തുടര്ന്ന് ഹോര്മുസ് കടലിടുക്കിലൂടെയുള്ള ഇറക്കുമതി തടസ്സപ്പെടുമോ എന്ന ആശങ്ക നിലനില്ക്കെയാണ് റഷ്യയുടെ ഈ നീക്കം. ഇത് ഇന്ത്യയ്ക്ക് ഏറെ ഗുണം ചെയ്യുന്ന കാര്യമാണ്. ഇന്ത്യയുടെ വര്ധിച്ചുവരുന്ന ആവശ്യകത പരിഗണിച്ച് കൂടുതല് ക്രൂഡ് ഓയില് എത്തിക്കാന് റഷ്യ സന്നദ്ധത അറിയിച്ചിട്ടുണ്ട്. കൂടാതെ കൂടംകുളം ആണവനിലയത്തിന്റെ റിയാക്ടര് നിര്മ്മാണം നിശ്ചിത സമയത്തിനുള്ളില് തന്നെ പൂര്ത്തിയാക്കുമെന്നും റഷ്യ ഉറപ്പുനല്കിയിട്ടുണ്ട്. ഇത് ഇന്ത്യയുടെ ആഭ്യന്തര വൈദ്യുതി ഉല്പ്പാദനത്തിന് വലിയ വേഗത നല്കും.
അഞ്ച് എസ്-400 വ്യോമ പ്രതിരോധ സംവിധാനങ്ങള് കൈമാറുന്ന കാര്യത്തിലും അനുകൂലമായ ചര്ച്ചകള് നടന്നു. ഇന്ത്യന് കാര്ഷിക മേഖലയ്ക്ക് വലിയ ആശ്വാസമാകുന്ന പ്രഖ്യാപനമാണ് രാസവള വിതരണ കാര്യത്തില് ഉണ്ടായത്. 2025 അവസാനത്തോടെ ഇന്ത്യയിലേക്കുള്ള രാസവള വിതരണത്തില് 40 ശതമാനം വര്ധനവാണ് റഷ്യ രേഖപ്പെടുത്തിയിരിക്കുന്നത്. ഇന്ത്യയുടെ ആവശ്യാനുസരണം ഇനിയും കൂടുതല് വളം എത്തിക്കാന് തയ്യാറാണെന്ന് മാന്തുറോവ് അറിയിച്ചു. അന്താരാഷ്ട്ര വിപണിയിലെ വിലക്കയറ്റത്തില് നിന്ന് ഇന്ത്യന് കര്ഷകര്ക്ക് ഇത് വലിയ സംരക്ഷണം നല്കും.
പ്രധാനമന്ത്രിക്ക് പുറമെ വിദേശകാര്യമന്ത്രി എസ്. ജയശങ്കര്, ദേശീയ സുരക്ഷാ ഉപദേഷ്ടാവ് അജിത് ഡോവല്, ധനമന്ത്രി നിര്മ്മല സീതാരാമന് എന്നിവരുമായും റഷ്യന് ഉപപ്രധാനമന്ത്രി ചര്ച്ചകള് നടത്തി. സാങ്കേതികവിദ്യ, ബഹിരാകാശം, വിദ്യാഭ്യാസം തുടങ്ങിയ മേഖലകളില് പുതിയ നിക്ഷേപങ്ങള്ക്കും സഹകരണത്തിനുമുള്ള സാധ്യതകള് തുറന്നുകിട്ടുന്നത് ഇന്ത്യയുടെ സാമ്പത്തിക വളര്ച്ചയ്ക്ക് പുതിയ കരുത്ത് പകരും. റഷ്യയുമായുള്ള ഈ ദൃഢമായ ബന്ധം പ്രതിസന്ധിക്കാലത്തും ഇന്ത്യയുടെ വിപണിയെയും വികസനക്കുതിപ്പിനെയും സുരക്ഷിതമാക്കുമെന്നാണ് കരുതപ്പെടുന്നത്.
