തിരുവനന്തപുരം: സംസ്ഥാനത്ത് അടുത്ത അഞ്ച് ദിവസം ഒറ്റപ്പെട്ട ശക്തമായ മഴയ്ക്ക് സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. ഏപ്രില്‍ 5, 6 തീയതികളില്‍ കനത്ത മഴയ്ക്ക് സാധ്യതയുള്ളതിനാല്‍ വിവിധ ജില്ലകളില്‍ സുരക്ഷാ മുന്‍കരുതലിന്റെ ഭാഗമായി മഞ്ഞ (ഥലഹഹീം) അലര്‍ട്ട് പ്രഖ്യാപിച്ചു. ഇന്നും നാളെയും (ഏപ്രില്‍ 5, 6) താഴെ പറയുന്ന ജില്ലകളിലാണ് യെല്ലോ അലര്‍ട്ട് ഏര്‍പ്പെടുത്തിയിരിക്കുന്നത്. പത്തനംതിട്ട, ഇടുക്കി, പാലക്കാട്, മലപ്പുറം. ഈ ജില്ലകളില്‍ 24 മണിക്കൂറില്‍ 64.5 മില്ലിമീറ്റര്‍ മുതല്‍ 115.5 മില്ലിമീറ്റര്‍ വരെ മഴ ലഭിക്കാന്‍ സാധ്യതയുണ്ട്.
തിങ്കളാഴ്ച വരെ മണിക്കൂറില്‍ 50 കിലോമീറ്റര്‍ വേഗതയിലും, തുടര്‍ന്ന് ഏപ്രില്‍ 8 വരെ 40 കിലോമീറ്റര്‍ വേഗതയിലും ശക്തമായ കാറ്റിന് സാധ്യതയുണ്ട്. ഇടിമിന്നല്‍ അപകടകാരിയായതിനാല്‍ പൊതുജനങ്ങള്‍ അതീവ ജാഗ്രത പാലിക്കണമെന്ന് ദുരന്തനിവാരണ അതോറിറ്റി നിര്‍ദ്ദേശിച്ചു. കാര്‍മേഘം കണ്ടുതുടങ്ങുമ്പോള്‍ തന്നെ തുറസായ സ്ഥലങ്ങളില്‍ നിന്ന് മാറി സുരക്ഷിതമായ കെട്ടിടങ്ങളിലേക്ക് മാറണം. ജനലും വാതിലും അടച്ചിടുക. ഇടിമിന്നലുള്ള സമയത്ത് ടിവി, ഫ്രിഡ്ജ് തുടങ്ങിയ ഗൃഹോപകരണങ്ങളുടെ പ്ലഗുകള്‍ ഊരിയിടുക. ടെലിഫോണ്‍ ഉപയോഗം ഒഴിവാക്കുക (മൊബൈല്‍ ഫോണ്‍ ഉപയോഗിക്കുന്നതില്‍ തടസ്സമില്ല).
ഇടിമിന്നല്‍ സമയത്ത് മരങ്ങളുടെ ചുവട്ടിലോ ടെറസിലോ നില്‍ക്കുന്നത് ഒഴിവാക്കണം. വാഹനങ്ങള്‍ മരച്ചുവട്ടില്‍ പാര്‍ക്ക് ചെയ്യരുത്. സൈക്കിള്‍, ബൈക്ക് യാത്രക്കാര്‍ മിന്നല്‍ സമയത്ത് യാത്ര ഒഴിവാക്കി കെട്ടിടങ്ങളില്‍ അഭയം തേടണം. കാറിനുള്ളില്‍ ഇരിക്കുന്നവര്‍ കൈകാലുകള്‍ പുറത്തിടാതിരിക്കാന്‍ ശ്രദ്ധിക്കുക. മഴയുള്ളപ്പോള്‍ കുളിക്കുന്നതും ടാപ്പുകളില്‍ നിന്ന് വെള്ളം ശേഖരിക്കുന്നതും ഒഴിവാക്കുക. മിന്നല്‍ സമയത്ത് മീന്‍പിടുത്തം, ബോട്ടിങ് എന്നിവ കര്‍ശനമായും നിര്‍ത്തിവെക്കണം.
കാറ്റില്‍ വീഴാന്‍ സാധ്യതയുള്ള വസ്തുക്കള്‍ കെട്ടിവെക്കുക. മുറ്റത്ത് തുണി ഉണക്കാനിട്ടിട്ടുണ്ടെങ്കില്‍ മഴക്കാറ് കാണുമ്പോള്‍ തന്നെ അവ മാറ്റുക. മിന്നല്‍ സമയത്ത് ഇതിനായി പുറത്തിറങ്ങരുത്. അപ്രതീക്ഷിതമായി എത്തുന്ന ഇടിമിന്നല്‍ ജീവനും സ്വത്തിനും ഭീഷണിയായതിനാല്‍ കാലാവസ്ഥാ വകുപ്പിന്റെ നിര്‍ദ്ദേശങ്ങള്‍ കര്‍ശനമായി പാലിക്കണമെന്ന് അധികൃതര്‍ ഓര്‍മ്മിപ്പിച്ചു.
