തിരുവനന്തപുരം: കേരള നിയമസഭാ തിരഞ്ഞെടുപ്പിന്റെ പരസ്യപ്രചാരണം സമാപിക്കുമ്പോള്‍, സംസ്ഥാനം കണ്ടിട്ടുള്ളതില്‍ വച്ച് ഏറ്റവും ശക്തമായ ത്രികോണ മത്സരത്തിനാണ് ഇത്തവണ കളമൊരുങ്ങുന്നത്. ഇടത്-വലത് മുന്നണികളുടെ പരാജയപ്പെട്ട ഭരണശൈലിക്കും വര്‍ഗീയ പ്രീണനത്തിനുമെതിരെ എന്‍ഡിഎ ഒരു കരുത്തുറ്റ ബദലായി മാറിയതാണ് ഈ തിരഞ്ഞെടുപ്പിന്റെ ഏറ്റവും വലിയ സവിശേഷത. മുന്‍കാലങ്ങളില്‍ ബിജെപിയെ തടയാന്‍ എല്‍ഡിഎഫും യുഡിഎഫും പരസ്പരം വോട്ട് മറിച്ചിരുന്ന രീതി ഇത്തവണ ഫലിക്കില്ലെന്ന തിരിച്ചറിവ് ഇരുമുന്നണികളെയും കടുത്ത സമ്മര്‍ദ്ദത്തിലാക്കിയിട്ടുണ്ട്.
ഭരണപരമായ പരാജയങ്ങളും അഴിമതി ആരോപണങ്ങളും ചര്‍ച്ചയാകാതിരിക്കാന്‍ എല്‍ഡിഎഫും യുഡിഎഫും വര്‍ഗീയ ധ്രുവീകരണത്തിന് ശ്രമിക്കുന്നു എന്നതാണ് ഈ തിരഞ്ഞെടുപ്പിലെ ശ്രദ്ധേയമായ വശം. നിരോധിക്കപ്പെട്ട പിഎഫ്ഐയുടെ രാഷ്‌ട്രീയ രൂപമായ എസ്ഡിപിഐ, ജമാഅത്തെ ഇസ്ലാമിയുടെ വെല്‍ഫെയര്‍ പാര്‍ട്ടി, മദനിയുടെ പിഡിപി തുടങ്ങിയ സംഘടനകളുടെ സ്വാധീനത്തിലാണ് ഇരുമുന്നണികളുമെന്ന് ആക്ഷേപം ഉയര്‍ന്നു കഴിഞ്ഞു. ന്യൂനപക്ഷ വോട്ട് ബാങ്ക് ലക്ഷ്യമിട്ടുള്ള ഈ നീക്കങ്ങള്‍ക്കെതിരെ, ‘വികസനം’ എന്ന ഒരേയൊരു അജണ്ട മുന്‍നിര്‍ത്തിയാണ് എന്‍ഡിഎ കളം നിറയുന്നത്. നരേന്ദ്ര മോദി സര്‍ക്കാരിന്റെ വികസന പദ്ധതികള്‍ കേരളത്തിന്റെ മണ്ണില്‍ മാറ്റമുണ്ടാക്കുമെന്ന് യുവാക്കളും സ്ത്രീകളും ഒരുപോലെ വിശ്വസിക്കുന്നു.
തിരഞ്ഞെടുപ്പ് ഗോദയില്‍ എന്‍ഡിഎ ഒറ്റക്കെട്ടായി നീങ്ങുമ്പോള്‍, എല്‍ഡിഎഫിലും യുഡിഎഫിലും ആഭ്യന്തര കലഹം രൂക്ഷമാണ്. പിണറായി വിജയന്‍ എന്ന വ്യക്തിയിലേക്ക് മാത്രം ഒതുങ്ങിയ പ്രചാരണമാണ് എല്‍ഡിഎഫിന്റേത്. ശബരിമല സ്വര്‍ണ്ണ മോഷണക്കേസില്‍ പ്രമുഖ നേതാക്കള്‍ പ്രതികളായതും സ്ഥാനാര്‍ത്ഥി നിര്‍ണ്ണയത്തിലെ സ്വജനപക്ഷപാതവും സിപിഎമ്മിനുള്ളില്‍ വലിയ പൊട്ടിത്തെറികള്‍ക്ക് കാരണമായി. എം.വി. ഗോവിന്ദന്റെ ഭാര്യ പി.കെ. ശ്യാമളയുടെ സ്ഥാനാര്‍ത്ഥിത്വവും ജി. സുധാകരനെപ്പോലുള്ള മുതിര്‍ന്ന നേതാക്കള്‍ പാര്‍ട്ടി വിട്ടതും ഇടതുപക്ഷത്തിന് കനത്ത തിരിച്ചടിയായിട്ടുണ്ട്.
അതേസമയം അര ഡസനോളം മുഖ്യമന്ത്രി സ്ഥാനാര്‍ത്ഥികളുമായി നീങ്ങുന്ന യുഡിഎഫിനെ നിയന്ത്രിക്കുന്നത് മുസ്ലിം ലീഗാണെന്ന ആക്ഷേപം ശക്തമാണ്. ജമാഅത്തെ ഇസ്ലാമിയുമായുള്ള ലീഗിന്റെ അവിശുദ്ധ കൂട്ടുകെട്ടും വയനാട് ദുരന്തബാധിതരെ ഭവനവാഗ്ദാനം നല്‍കി പറ്റിച്ചതും യുഡിഎഫിന്റെ വിശ്വാസ്യത തകര്‍ത്തു. ഇരുമുന്നണികളില്‍ നിന്നും പുറത്തുവന്ന പ്രമുഖ നേതാക്കള്‍ ഇത്തവണ സ്വതന്ത്രരായി മത്സരിക്കുന്നത് എല്‍ഡിഎഫിനെയും യുഡിഎഫിനെയും ഒരുപോലെ വിറപ്പിക്കുന്നുണ്ട്. ജി. സുധാകരന്‍ (അമ്പലപ്പുഴ), പി.വി. കുഞ്ഞികൃഷ്ണന്‍ (പയ്യന്നൂര്‍), പി.കെ. ശശി (ഒറ്റപ്പാലം), ഐഷ പോറ്റി (കൊട്ടാരക്കര) തുടങ്ങി വലിയൊരു നിര തന്നെ സിപിഎമ്മിനെതിരെ രംഗത്തുണ്ട്. കോണ്‍ഗ്രസില്‍ നിന്നും സമാനമായ രീതിയില്‍ പ്രമുഖര്‍ പുറത്തുപോയിട്ടുണ്ട്.
പ്രധാനമന്ത്രി നരേന്ദ്ര മോദി, ആഭ്യന്തരമന്ത്രി അമിത് ഷാ തുടങ്ങിയ ദേശീയ നേതാക്കളുടെ സന്ദര്‍ശനം എന്‍ഡിഎ പ്രവര്‍ത്തകര്‍ക്ക് വലിയ ആവേശമാണ് പകര്‍ന്നിരിക്കുന്നത്. അഴിമതിയില്‍ മുങ്ങിയ ഇടത്-വലത് രാഷ്‌ട്രീയത്തിന് വിട നല്‍കി, വികസനത്തിന് വോട്ട് ചെയ്യാന്‍ കേരളം തയ്യാറെടുക്കുന്നു എന്ന ശുഭപ്രതീക്ഷയിലാണ് എന്‍ഡിഎ ക്യാമ്പ്. വോട്ടെടുപ്പ് പൂര്‍ത്തിയാകുമ്പോള്‍ കേരള രാഷ്‌ട്രീയത്തില്‍ എന്‍ഡിഎ പുതിയ ചരിത്രമെഴുതുമെന്നുറപ്പാണ്.
