തിരുവനന്തപുരം: നിയമസഭാ തിരഞ്ഞെടുപ്പില് കേരളം വലിയ മാറ്റത്തിന് സാക്ഷ്യം വഹിക്കുമെന്നും ബിജെപി നയിക്കുന്ന എന്ഡിഎ സംസ്ഥാനത്ത് നിര്ണ്ണായക ശക്തിയായി മാറുമെന്നും ബിജെപി സംസ്ഥാന അധ്യക്ഷനും നേമത്തെ സ്ഥാനാര്ഥിയുമായ രാജീവ് ചന്ദ്രശേഖര്. ‘വികസിത കേരളം’ എന്ന ബിജെപിയുടെ മുദ്രാവാക്യം വോട്ടര്മാര് നെഞ്ചേറ്റിയിട്ടുണ്ടെന്നും അദ്ദേഹം മാധ്യമങ്ങളോട് പറഞ്ഞു. തിരഞ്ഞെടുപ്പ് ദിനത്തില് വോട്ട് രേഖപ്പെടുത്തിയ ശേഷം സംസാരിക്കുകയായിരുന്നു അദ്ദേഹം. സഭയില് ബഹളം വെക്കാനല്ല, മറിച്ച് ജനങ്ങളുടെ പ്രശ്നങ്ങള്ക്ക് പരിഹാരം കാണാനാണ് തങ്ങള് വോട്ട് ചോദിക്കുന്നതെന്ന് അദ്ദേഹം വ്യക്തമാക്കി. ‘നിയമസഭയില് ചെന്ന് കമ്പ്യൂട്ടര് തകര്ക്കാനോ മേശപ്പുറത്ത് കയറി നൃത്തം ചെയ്യാനോ അല്ല ബിജെപി അവസരം തേടുന്നത്. നാടിന്റെ വികസനത്തിനായാണ് ഞങ്ങള് മത്സരിക്കുന്നത്,’ അദ്ദേഹം പരിഹസിച്ചു.
മാറാത്തതിനെ മാറ്റണമെന്നും കേരളം ഇനി വളരണമെന്നുമാണ് ബിജെപിയുടെ നിലപാടെന്ന് അദ്ദേഹം കൂട്ടിച്ചേര്ത്തു. എന്ഡിഎയുടെ സിറ്റിംഗ് സീറ്റായ നേമത്ത് വലിയ വിജയപ്രതീക്ഷയുണ്ടെന്ന് രാജീവ് ചന്ദ്രശേഖര് പറഞ്ഞു. കേരളത്തിലെ 140 മണ്ഡലങ്ങളിലും മാറ്റത്തിന്റെ തരംഗമുണ്ട്. എല്ഡിഎഫിനോ യുഡിഎഫിനോ വ്യക്തമായ ഭൂരിപക്ഷം കിട്ടാത്ത വിധം ബിജെപി കരുത്താര്ജ്ജിക്കുമെന്നും മേയ് നാലിന് പുറത്തുവരുന്ന ഫലം അത് തെളിയിക്കുമെന്നും അദ്ദേഹം അവകാശപ്പെട്ടു. ഇന്നത്തെ ദിവസം സന്തോഷകരമാണെന്നും വിവാദങ്ങള്ക്കില്ലെന്നും അദ്ദേഹം പറഞ്ഞു. പരാതികളില് നിയമപരമായ നടപടികള് സ്വീകരിക്കാന് പോലീസും തിരഞ്ഞെടുപ്പ് കമ്മീഷനും ഉണ്ടെന്നായിരുന്നു അദ്ദേഹത്തിന്റെ പ്രതികരണം. നാടിന്റെ ഭാവി തീരുമാനിക്കാനുള്ള ഈ ജനാധിപത്യ ഉത്സവത്തില് എല്ലാവരും പങ്കുചേരണമെന്നും അദ്ദേഹം വോട്ടര്മാരോട് അഭ്യര്ത്ഥിച്ചു.
