അമരാവതി: വിനോദയാത്രയ്ക്കിടെ വെള്ളച്ചാട്ടത്തില് സെല്ഫിയെടുക്കാന് ശ്രമിച്ച മൂന്ന് പെണ്കുട്ടികള് മുങ്ങിമരിച്ചു. ആന്ധ്രപ്രദേശിലെ അല്ലൂരി സീതാരാമ രാജു ജില്ലയിലുള്ള മുളഗുമ്മി വെള്ളച്ചാട്ടത്തിലാണ് നാടിനെ നടുക്കിയ അപകടം നടന്നത്. ഹുകുംപേട്ട സ്വദേശികളായ തൃഷ (17), രത്നകുമാരി (16), പവിത്ര (16) എന്നിവരാണ് മരിച്ചത്. അനന്തഗിരി ഹില്സിലേക്ക് വിനോദയാത്രയ്ക്കെത്തിയതായിരുന്നു പെണ്കുട്ടികളടങ്ങുന്ന സംഘം. വിശാഖപട്ടണത്തിന് സമീപമുള്ള വെള്ളച്ചാട്ടത്തില് ഫോട്ടോയെടുക്കുന്നതിനായി ഇവര് പാറക്കെട്ടുകള്ക്ക് മുകളിലൂടെ വെള്ളത്തിലേക്കിറങ്ങി.
പായല് പിടിച്ച വഴുക്കലുള്ള പാറകളിലൂടെയാണ് ഇവര് വെള്ളത്തിലേക്ക് നീങ്ങിയത്. ഇതിനിടെ ഒരാള് തിരികെ കയറാന് ശ്രമിച്ചെങ്കിലും വഴുക്കല് കാരണം സാധിച്ചില്ല. ഫോട്ടോയെടുക്കുന്നതിനിടെ നിയന്ത്രണം നഷ്ടപ്പെട്ട് മൂവരും പെട്ടെന്ന് കയത്തിലേക്ക് വീഴുകയായിരുന്നു. കൂടെയുണ്ടായിരുന്ന മറ്റൊരു പെണ്കുട്ടിയുടെ നിലവിളി കേട്ടാണ് നാട്ടുകാര് വിവരമറിയുന്നത്. അപകടത്തില്പ്പെട്ടവരെ രക്ഷിക്കാന് ശ്രമിച്ച മറ്റൊരു കുട്ടിയെ നാട്ടുകാര് സാഹസികമായി കരയ്ക്കെത്തിച്ചു. ഈ കുട്ടി നിലവില് ചികിത്സയിലാണ്. എന്നാല് മരിച്ച മൂന്ന് പേര്ക്കും നീന്തല് അറിയില്ലായിരുന്നുവെന്ന് പോലീസ് പറഞ്ഞു. വിവരമറിഞ്ഞ് സ്ഥലത്തെത്തിയ പോലീസും ഫയര്ഫോഴ്സും മണിക്കൂറുകള് നീണ്ട തിരച്ചിലിനൊടുവിലാണ് മൃതദേഹങ്ങള് കണ്ടെടുത്തത്.
അപകടം നടന്ന പ്രദേശം അതീവ അപകടസാധ്യതയുള്ളതാണെന്നും സന്ദര്ശകര്ക്ക് ഇവിടെ വിലക്കേര്പ്പെടുത്തിയിട്ടുള്ളതാണെന്നും ജില്ലാ അധികൃതര് വ്യക്തമാക്കി. നിരോധനമുണ്ടായിട്ടും വിനോദസഞ്ചാരികള് വെള്ളച്ചാട്ടം കാണാനും ചിത്രങ്ങള് പകര്ത്താനും ഇവിടെ എത്താറുണ്ട്. ജലാശയങ്ങള്ക്കടുത്ത് പോകുമ്പോള് അതീവ ജാഗ്രത പാലിക്കണമെന്നും സെല്ഫി എടുക്കുന്നതിനായി ജീവന് പണയപ്പെടുത്തരുതെന്നും പോലീസ് വീണ്ടും മുന്നറിയിപ്പ് നല്കി. സംഭവത്തില് പോലീസ് കേസെടുത്ത് അന്വേഷണം ആരംഭിച്ചു.
