കണ്ണൂര്‍: അഞ്ചരക്കണ്ടി കണ്ണൂര്‍ ഡെന്റല്‍ കോളജിലെ ബിഡിഎസ് ഒന്നാം വര്‍ഷ വിദ്യാര്‍ത്ഥി കെട്ടിടത്തിന് മുകളില്‍ നിന്ന് വീണു മരിച്ച സംഭവത്തില്‍ ആരോപണവിധേയരായ രണ്ട് അധ്യാപകരെ സസ്പെന്ഡ് ചെയ്തു. തിരുവനന്തപുരം നെടുമങ്ങാട് സ്വദേശി ആര്‍.എല്‍. നിതിന്‍ രാജിന്റെ (23) മരണത്തിലാണ് കോളജ് അധികൃതരുടെ നടപടി. അനാട്ടമി വിഭാഗം മേധാവി ഡോ. എം.കെ. റാം, അസോസിയേറ്റ് പ്രൊഫസര്‍ ഡോ. സംഗീത എന്നിവര്‍ക്കെതിരെയാണ് അന്വേഷണവിധേയമായി നടപടിയെടുത്തത്.
മരിച്ച നിതിന്‍ രാജ് അധ്യാപകരില്‍ നിന്ന് കടുത്ത ജാതി അധിക്ഷേപം നേരിട്ടിരുന്നതായി കുടുംബം ആരോപിച്ചു. ഈ പരാതി ഗൗരവമായി പരിഗണിച്ചാണ് കോളജ് രൂപീകരിച്ച പ്രത്യേക അന്വേഷണ സമിതിയുടെ പ്രാഥമിക നടപടി. സമിതിയുടെ അന്തിമ റിപ്പോര്‍ട്ട് ലഭിച്ച ശേഷമായിരിക്കും അധ്യാപകര്‍ക്കെതിരായ തുടര്‍ന്നുള്ള നടപടികള്‍ സ്വീകരിക്കുക. വെള്ളിയാഴ്ച ഉച്ചയ്‌ക്ക് രണ്ട് മണിയോടെയാണ് കോളജ് ലൈബ്രറി കെട്ടിടത്തിന് സമീപം നിതിന്‍ രാജിനെ വീണുകിടക്കുന്ന നിലയില്‍ കണ്ടെത്തിയത്.
ആശുപത്രിയിലെത്തിയ ഒരു കുട്ടിയാണ് വിവരം അധികൃതരെ അറിയിച്ചത്. ഉടന്‍ തന്നെ അത്യാഹിത വിഭാഗത്തില്‍ എത്തിച്ചെങ്കിലും ജീവന്‍ രക്ഷിക്കാനായില്ല. ആന്തരിക രക്തസ്രാവമാണ് മരണകാരണമെന്നാണ് പ്രാഥമിക നിഗമനം. നിതിന്‍ രാജ് കെട്ടിടത്തിന്റെ മുകളിലത്തെ നിലയിലേക്ക് പോകുന്നത് സിസിടിവി ദൃശ്യങ്ങളില്‍ വ്യക്തമാണ്. നിതിന്‍ രാജിന് കോളജില്‍ മറ്റു പ്രശ്‌നങ്ങളുണ്ടായിരുന്നില്ലെന്നും എന്നാല്‍ ക്യാമ്പസിന് പുറത്ത് ചില സാമ്പത്തിക ഇടപാടുകള്‍ സംബന്ധിച്ച കേസുകളുണ്ടായിരുന്നുവെന്നുമാണ് പ്രിന്‍സിപ്പല്‍ ഡോ. വിനോദ് വ്യക്തമാക്കുന്നത്.
മരണത്തിന് തൊട്ടുമുന്‍പുള്ള ക്ലാസില്‍ വിദ്യാര്‍ത്ഥി കയറിയിരുന്നില്ലെന്നും അധികൃതര്‍ പറഞ്ഞു. വൈ.എല്‍. രാജന്റെയും സി.ആര്‍. ലതയുടെയും മകനാണ് നിതിന്‍ രാജ്. പോലീസ് വിദ്യാര്‍ത്ഥിയുടെ ഹോസ്റ്റല്‍ മുറി പൂട്ടി മുദ്രവെച്ചു. കൂടുതല്‍ തെളിവുകള്‍ക്കായി മൊബൈല്‍ ഫോണ്‍ ഉള്‍പ്പെടെയുള്ളവ പരിശോധിച്ചുവരികയാണ്.
