ഭുവനേശ്വര്: ഒഡിഷയിലെ മയൂര്ഭഞ്ച് ജില്ലയിലുള്ള സര്ക്കാര് എയ്ഡഡ് റെസിഡന്ഷ്യല് സ്കൂളില് (ആശ്രമം സ്കൂള്) ഉണ്ടായ ഭക്ഷ്യവിഷബാധയെത്തുടര്ന്ന് ഒരു വിദ്യാര്ത്ഥിനി മരിച്ചു. കകബന്ധ ആശ്രമം സ്കൂളിലെ അഞ്ചാം ക്ലാസ് വിദ്യാര്ത്ഥിനിയായ രൂപാലി ബെസ്രയാണ് ഇന്നലെ മരിച്ചത്. നൂറിലധികം വിദ്യാര്ത്ഥികള് ആശുപത്രിയില് ചികിത്സയിലാണ്. കഴിഞ്ഞ ഞായറാഴ്ചരാവിലെ സ്കൂളില് വിളമ്പിയ ഭക്ഷണത്തിന് പിന്നാലെയാണ് വിദ്യാര്ത്ഥികള്ക്ക് ശാരീരിക അസ്വസ്ഥതകള് അനുഭവപ്പെട്ടത്.
സ്കൂള് മെനുവില് ഇല്ലാത്ത പഴയ ചോറ് (പഖാല), ഉടച്ച ഉരുളക്കിഴങ്ങ്, മാങ്ങ ചമ്മന്തി എന്നിവയാണ് കുട്ടികള്ക്ക് നല്കിയതെന്ന് രക്ഷിതാക്കള് ആരോപിക്കുന്നു. നൂറിലധികം കുട്ടികളെ പ്രാദേശിക ആരോഗ്യ കേന്ദ്രത്തില് പ്രവേശിപ്പിച്ചു. നില വഷളായ 67 കുട്ടികളെ ബാരിപദയിലെ പി.എം.ആര് മെഡിക്കല് കോളേജ് ആശുപത്രിയിലേക്ക് മാറ്റി. തീവ്രപരിചരണ വിഭാഗത്തില് ചികിത്സയിലായിരുന്ന രൂപാലി ഇന്നലെ പുലര്ച്ചെയോടെയാണ് മരണത്തിന് കീഴടങ്ങിയത്.
സംഭവത്തില് ഒഡിഷ മുഖ്യമന്ത്രി മോഹന് ചരണ് മാജി ഉന്നതതല അന്വേഷണത്തിന് ഉത്തരവിട്ടു. റവന്യൂ ഡിവിഷണല് കമ്മീഷണറുടെ നേതൃത്വത്തില് ഇന്ന് സ്കൂളില് വിശദമായ പരിശോധന നടക്കും. കൃത്യവിലോപത്തിനും മെനുവില് ഇല്ലാത്ത ഭക്ഷണം കുട്ടികള്ക്ക് നല്കിയതിനും സ്കൂള് ഹെഡ്മാസ്റ്റര് ജയന്ത് കുമാര് പാണിഗ്രാഹിയെ സസ്പെന്ഡ് ചെയ്തു. മരിച്ച കുട്ടിയുടെ കുടുംബത്തിന് ആകെ ഏഴ് ലക്ഷം രൂപ ധനസഹായം സര്ക്കാര് പ്രഖ്യാപിച്ചിട്ടുണ്ട്.
വിദ്യാര്ത്ഥിനിയുടെ മരണത്തെത്തുടര്ന്ന് രോഷാകുലരായ നാട്ടുകാര് റാസ്ഗോവിന്ദ്പൂര്-ജലേശ്വര് റോഡ് ഉപരോധിച്ചു. മരിച്ച കുട്ടിയുടെ മാതാവിന്റെ പരാതിയില് പോലീസ് കേസെടുത്തിട്ടുണ്ട്. വീഴ്ച വരുത്തിയ അധ്യാപകര്ക്കും ഉദ്യോഗസ്ഥര്ക്കുമെതിരെ കര്ശന നടപടിയുണ്ടാകുമെന്ന് ജില്ലാ കളക്ടര് ഹേമകാന്ത സായ് ഉറപ്പുനല്കി. നിലവില് വിദഗ്ധ മെഡിക്കല് സംഘങ്ങള് സ്കൂളിലും ആശുപത്രിയിലും ക്യാമ്പ് ചെയ്യുന്നുണ്ട്. കുട്ടികളുടെ ആരോഗ്യനില തൃപ്തികരമാണെന്ന് അധികൃതര് അറിയിച്ചു.
