നെടുമ്പാശേരി: സമൂഹമാധ്യമങ്ങളിലെ പരിചിത മുഖമായ റിന്സി മുംതാസ് മാരക ലഹരിമരുന്നായ എംഡിഎംഎയുമായി വീണ്ടും പോലീസ് പിടിയിലായി. നെടുമ്പാശേരി വിമാനത്താവളത്തിന് സമീപമുള്ള ഹോട്ടലില് നിന്ന് റിന്സിക്കൊപ്പം മറ്റ് മൂന്ന് യുവാക്കളെയും നെടുമ്പാശേരി പോലീസ് കസ്റ്റഡിയിലെടുത്തു. സിനിമാ മേഖലയിലെ യുവതാരങ്ങള്ക്കും മറ്റും ലഹരി എത്തിച്ചു നല്കുന്ന റാക്കറ്റിലെ പ്രധാനികളാണ് ഇവരെന്നാണ് പോലീസ് നല്കുന്ന സൂചന.
റിന്സി മുംതാസിനൊപ്പം വാഴക്കാല സ്വദേശി മുഹമ്മദ് റിഷാഖ്, ആലുവ സ്വദേശി അഭിജിത്ത്, നൂറനാട് സ്വദേശി ബിജു എന്നിവരാണ് പേലീസ് പിടിയിലായത്. ഹോട്ടല് മുറി കേന്ദ്രീകരിച്ച് ലഹരിമരുന്ന് വില്പനയും ഉപയോഗവും നടക്കുന്നുണ്ടെന്ന രഹസ്യവിവരത്തെത്തുടര്ന്നാണ് പോലീസ് പരിശോധന നടത്തിയത്. സിനിമാ പ്രമോഷന് ജോലികളുടെ മറവിലാണ് റിന്സി ലഹരിയിടപാടുകള് നടത്തിയിരുന്നത്. സിനിമയിലെ യുവതാരങ്ങളുമായി ഇവര്ക്ക് അടുത്ത ബന്ധമുണ്ടെന്നും ഈ ബന്ധം ഉപയോഗിച്ച് ലഹരിമരുന്ന് കൈമാറിയിരുന്നതായും പോലീസ് സംശയിക്കുന്നു.
ഇവരുടെ പക്കല് നിന്ന് വില്പനയ്ക്കായി കരുതിയ എംഡിഎംഎ പോലീസ് കണ്ടെടുത്തിട്ടുണ്ട്. ഇതിന്റെ ഉറവിടത്തെക്കുറിച്ച് അന്വേഷണം ആരംഭിച്ചു. ഇത് രണ്ടാം തവണയാണ് റിന്സി മുംതാസ് ലഹരിക്കേസില് കുടുങ്ങുന്നത്. കഴിഞ്ഞ ജൂലൈ മാസത്തില് കാക്കനാട്ടെ ഫ്ലാറ്റില് വെച്ച് എംഡിഎംഎയുമായി ഇവരെ പോലീസ് പിടികൂടിയിരുന്നു.
ജാമ്യത്തിലിറങ്ങിയ ശേഷം വീണ്ടും സമാനമായ കുറ്റകൃത്യത്തില് ഏര്പ്പെടുകയായിരുന്നു. ഇന്സ്റ്റഗ്രാമിലും യുട്യൂബിലും പതിനായിരക്കണക്കിന് ഫോളോവേഴ്സുള്ള റിന്സി, തന്റെ സ്വാധീനം ലഹരി മാഫിയക്കായി ഉപയോഗിച്ചുവെന്നാണ് കണ്ടെത്തല്. പിടിയിലായ നാല് പേരെയും വിശദമായി ചോദ്യം ചെയ്തു വരികയാണ്. ലഹരി വിതരണ ശൃംഖലയിലെ വമ്പന് സ്രാവുകളെ കണ്ടെത്താന് കൊച്ചി സിറ്റി പോലീസിന്റെ പ്രത്യേക സംഘം അന്വേഷണം ഊര്ജ്ജിതമാക്കി.
