ന്യൂഡല്ഹി: പാര്ലമെന്റിന്റെ പ്രത്യേക സമ്മേളനം ആരംഭിക്കാനിരിക്കെ, സ്ത്രീശാക്തീകരണത്തില് ഇന്ത്യ ഒരു ‘ചരിത്രപരമായ ചുവടുവെപ്പിന്’ ഒരുങ്ങുകയാണെന്ന് പ്രധാനമന്ത്രി നരേന്ദ്ര മോദി പറഞ്ഞു. ‘നമ്മുടെ അമ്മമാരോടും സഹോദരിമാരോടുമുള്ള ആദരവ് രാജ്യത്തോടുള്ള ആദരവാണ്’ എന്ന് അദ്ദേഹം വ്യക്തമാക്കി. ഭരണനിര്വഹണത്തില് സ്ത്രീകളുടെ പങ്കാളിത്തം ഉറപ്പാക്കുന്നതിനും ശക്തിപ്പെടുത്തുന്നതിനും സര്ക്കാര് നിശ്ചയദാര്ഢ്യത്തോടെ മുന്നോട്ട് പോവുകയാണെന്ന് സമ്മേളനത്തിന് മുന്നോടിയായി പ്രധാനമന്ത്രി വ്യക്തമാക്കി.
വനിതാ സംവരണ നിയമം നടപ്പിലാക്കുന്നത് വേഗത്തിലാക്കുന്നതിനായി ഇന്ന് മുതല് 18 വരെയാണ് പാര്ലമെന്റിന്റെ മൂന്ന് ദിവസത്തെ പ്രത്യേക സമ്മേളനം വിളിച്ചുചേര്ത്തിരിക്കുന്നത്. വനിതാ സംവരണം സുഗമമാക്കുന്നതിനായി ലോക്സഭയിലെ നിലവിലെ 543 സീറ്റുകള് പരമാവധി 850 ആയി ഉയര്ത്താനാണ് സര്ക്കാര് ലക്ഷ്യമിടുന്നത്. പുതിയ പദ്ധതി പ്രകാരം സംസ്ഥാനങ്ങള്ക്ക് 815 സീറ്റുകളും കേന്ദ്രഭരണ പ്രദേശങ്ങള്ക്ക് 35 സീറ്റുകളും ലഭിച്ചേക്കാം. ഇതില് സ്ത്രീകള്ക്കായി നീക്കിവെക്കേണ്ട സീറ്റുകള് സംബന്ധിച്ച അന്തിമ തീരുമാനം ഡീലിമിറ്റേഷന് കമ്മീഷന് കൈക്കൊള്ളും.
നിര്ദ്ദിഷ്ട മാറ്റങ്ങള് 2029-ലെ ലോക്സഭാ തിരഞ്ഞെടുപ്പ് മുതല് പ്രാബല്യത്തില് വരുമെന്നാണ് പ്രതീക്ഷിക്കുന്നത്. ആനുപാതിക പ്രാതിനിധ്യത്തിന്റെ അടിസ്ഥാനത്തിലായിരിക്കും സീറ്റ് വിഭജനം. ഇതിനായി 2011-ലെ സെന്സസ് മാനദണ്ഡമാക്കിയേക്കും. ഉത്തരേന്ത്യന് സംസ്ഥാനങ്ങളെ അപേക്ഷിച്ച് ജനസംഖ്യാ വളര്ച്ചാ നിരക്ക് കുറവായതിനാല്, സീറ്റ് വിഭജനത്തില് ദക്ഷിണേന്ത്യന് സംസ്ഥാനങ്ങള്ക്ക് ആപേക്ഷികമായ നേട്ടം ലഭിക്കാന് സാധ്യതയുണ്ടെന്ന് ഔദ്യോഗിക വൃത്തങ്ങള് സൂചിപ്പിക്കുന്നു. വനിതാ സംവരണ നിയമം നടപ്പിലാക്കുന്നതിലൂടെ രാജ്യത്തിന്റെ രാഷ്ട്രീയ ഭൂപടത്തില് വലിയ മാറ്റങ്ങള്ക്കാണ് കേന്ദ്ര സര്ക്കാര് തയ്യാറെടുക്കുന്നത്.
