കൊല്‍ക്കത്ത: തിരഞ്ഞെടുപ്പ് ആവേശത്തിനിടെ പശ്ചിമ ബംഗാളിലേക്ക് നിയമവിരുദ്ധമായി ആയുധങ്ങള്‍ കടത്താനുള്ള നീക്കം കൊല്‍ക്കത്ത പോലീസ് തടഞ്ഞു. സിറ്റി പോലീസിന്റെ പ്രത്യേക കര്‍മസേന നടത്തിയ മിന്നല്‍ പരിശോധനയില്‍ ബിഹാര്‍ സ്വദേശിയായ ആയുധക്കടത്തുകാരനെ പിടികൂടി. രഹസ്യവിവരത്തിന്റെ അടിസ്ഥാനത്തില്‍ രാജാബസാര്‍ സയന്‍സ് കോളേജ് മാര്‍ക്കറ്റിന് സമീപം ഉച്ചയ്‌ക്ക് 1.05-ഓടെയാണ് ഓപ്പറേഷന്‍ നടന്നത്. ബിഹാറിലെ നളന്ദ സ്വദേശിയായ സൊഹൈല്‍ അക്തര്‍ (43) ആണ് പിടിയിലായത്. ഇയാളില്‍ നിന്ന് 6 നാടന്‍ പിസ്റ്റളുകളും, 14 സജീവ തിരകളും, ആയുധ വിതരണ ശൃംഖലയുമായി ബന്ധപ്പെട്ട മറ്റ് രേഖകളും കണ്ടെത്തിയിട്ടുണ്ട്.
കൈവശം വെച്ചിരുന്ന ആയുധങ്ങള്‍ക്ക് നിയമപരമായ രേഖകളൊന്നും ഹാജരാക്കാന്‍ ഇയാള്‍ക്ക് സാധിച്ചിട്ടില്ല. തുടര്‍ന്ന് ആംസ് ആക്ട് പ്രകാരവും ഭാരതീയ ന്യായ സംഹിതയിലെ വകുപ്പുകള്‍ പ്രകാരവും പോലീസ് കേസെടുത്തു. തിരഞ്ഞെടുപ്പ് കാലത്ത് അശാന്തി പടര്‍ത്താനാണോ ഈ ആയുധങ്ങള്‍ എത്തിച്ചതെന്ന് പോലീസ് പരിശോധിച്ചു വരികയാണ്. ഈ ആയുധങ്ങള്‍ വാങ്ങാന്‍ പദ്ധതിയിട്ടിരുന്ന പ്രാദേശിക ഇടപാടുകാരെ കണ്ടെത്താനും പണമിടപാടുകള്‍ കേന്ദ്രീകരിച്ച് അന്വേഷണം നടത്താനും പ്രത്യേക സംഘത്തെ നിയോഗിച്ചു. ഈ സംഭവത്തെത്തുടര്‍ന്ന് നഗര അതിര്‍ത്തികളില്‍ സുരക്ഷ കര്‍ശനമാക്കിയിട്ടുണ്ട്.
പശ്ചിമ ബംഗാളില്‍ സ്വതന്ത്രവും നീതിപൂര്‍വവുമായ തിരഞ്ഞെടുപ്പ് ഉറപ്പാക്കാനുള്ള തിരഞ്ഞെടുപ്പ് കമ്മീഷന്റെ കടുത്ത നീക്കങ്ങള്‍ക്കിടയിലാണ് ഈ ആയുധവേട്ട നടന്നത്. സംസ്ഥാനത്ത് ഏപ്രില്‍ 23, 29 തീയതികളിലായി രണ്ട് ഘട്ടങ്ങളിലായാണ് വോട്ടെടുപ്പ് നടക്കുന്നത്. മെയ് 4-നാണ് വോട്ടെണ്ണല്‍. നിയമവിരുദ്ധ ആയുധങ്ങളുടെ ഒഴുക്ക് തടയുന്നത് വഴി അക്രമരഹിതമായ തിരഞ്ഞെടുപ്പ് സാധ്യമാക്കുകയാണ് പോലീസിന്റെ ലക്ഷ്യം.
