തൃശ്ശൂര്: തൃശ്ശൂര് പൂരത്തിന് കൊടിയേറിയതിന് പിന്നാലെ പൂരപ്രേമികളെ ഞെട്ടിച്ചുകൊണ്ട് വെടിക്കെട്ട് നിര്മ്മാണ കേന്ദ്രത്തില് വന് സ്ഫോടനം. മുണ്ടത്തിക്കോടുള്ള തിരുവമ്പാടി വിഭാഗത്തിന്റെ പടക്ക നിര്മ്മാണ ശാലയിലാണ് വൈകുന്നേരം അപകടമുണ്ടായത്. സംഭവത്തില് മരണം ആറായി. ഇവരുടെ മൃതദേഹം കണ്ടെത്തി. പൂരത്തിനായി വെടിക്കെട്ട് സാമഗ്രികള് തയ്യാറാക്കുന്നതിനിടെയുണ്ടായ സ്ഫോടനത്തില് 40-ഓളം തൊഴിലാളികള്ക്ക് പരിക്കേറ്റു.
തിരുവമ്പാടി വിഭാഗത്തിന്റെ സാമ്പിള് വെടിക്കെട്ട് പുരയിലാണ് പൊട്ടിത്തെറിയുണ്ടായത്. കിലോമീറ്ററുകള് ദൂരേക്ക് വരെ പ്രകമ്പനം സൃഷ്ടിച്ച സ്ഫോടനത്തില് സമീപത്തെ വീടുകള്ക്ക് കുലുക്കം അനുഭവപ്പെടുകയും നാശനഷ്ടങ്ങള് സംഭവിക്കുകയും ചെയ്തിട്ടുണ്ട്. ആദ്യ സ്ഫോടനത്തിന് പിന്നാലെ രക്ഷാപ്രവര്ത്തനം നടക്കുന്നതിനിടെ രണ്ടാമതൊരു സ്ഫോടനം കൂടി ഉണ്ടായത് പരിഭ്രാന്തി വര്ദ്ധിപ്പിച്ചു.
ഏകദേശം 40 പേര്ക്ക് പൊള്ളലേറ്റതായാണ് പ്രാഥമിക വിവരം. ഇതില് ചിലരുടെ നില ഗുരുതരമാണ്. പോലീസും ഫയര്ഫോഴ്സും നാട്ടുകാരും ചേര്ന്ന് പരിക്കേറ്റവരെ ഉടന് തന്നെ ആശുപത്രികളിലേക്ക് മാറ്റി. പരിക്കേറ്റവരുടെ എണ്ണം കൂടാന് സാധ്യതയുള്ളതിനാല് മെഡിക്കല് കോളേജ് ഉള്പ്പെടെയുള്ള ജില്ലയിലെ പ്രധാന ആശുപത്രികള്ക്ക് ജില്ലാ ഭരണകൂടം ജാഗ്രതാ നിര്ദ്ദേശം നല്കി.
ഏപ്രില് 26-ന് നടക്കാനിരിക്കുന്ന തൃശ്ശൂര് പൂരത്തിന്റെ മുന്നോടിയായുള്ള വെടിക്കെട്ട് ജോലികള് സജീവമായി നടക്കുന്നതിനിടെയാണ് ഈ ദുരന്തം. സ്ഫോടനത്തിന്റെ ശബ്ദം നഗരത്തിന്റെ വിവിധ ഭാഗങ്ങളില് കേട്ടതായി നാട്ടുകാര് പറഞ്ഞു. വെടിക്കെട്ട് സാമഗ്രികള് സൂക്ഷിച്ചിരുന്ന പുര പൂര്ണ്ണമായും തകര്ന്നു.
അപകടത്തെത്തുടര്ന്ന് പൂരത്തിന്റെ വെടിക്കെട്ട് നടത്തിപ്പുമായി ബന്ധപ്പെട്ട് ആശങ്കകള് ഉയര്ന്നിട്ടുണ്ട്. സ്ഫോടനത്തിന്റെ കാരണം വ്യക്തമല്ലെന്നും അന്വേഷണം ആരംഭിച്ചതായും പോലീസ് അറിയിച്ചു. പൂരത്തിന് ദിവസങ്ങള് മാത്രം ബാക്കിനില്ക്കെ ഉണ്ടായ ഈ അപകടം തൃശ്ശൂരിനെ വന് നടുക്കത്തിലാഴ്ത്തിയിരിക്കുകയാണ്.
