നെടുംകണ്ടം: കാണാതായ അമ്മയുടെയും മകന്റെയും മൃതദേഹങ്ങള്‍ വീടിനോട് ചേര്‍ന്ന കുഴിയില്‍ കണ്ടെത്തി. പച്ചടി സ്വദേശികളായ മേരിക്കുട്ടി, മകന്‍ റെജി എന്നിവരാണ് കൊല്ലപ്പെട്ടതെന്ന് സംശയിക്കുന്നു. കഴിഞ്ഞ ഒരു മാസമായി ഇവരെക്കുറിച്ച് വിവരമില്ലായിരുന്നു. മേരിക്കുട്ടിയെയും സഹോദരന്‍ റെജിയെയും ഫോണില്‍ പോലും ലഭിക്കാത്തതിനെത്തുടര്‍ന്ന് മകള്‍ സിനി പോലീസില്‍ പരാതി നല്‍കുകയായിരുന്നു. തുടര്‍ന്ന് പോലീസ് നടത്തിയ പ്രാഥമിക അന്വേഷണത്തിലാണ് വീട്ടുപറമ്പില്‍ സംശയാസ്പദമായ രീതിയില്‍ മണ്ണ് നീക്കിയ നിലയില്‍ കണ്ടെത്തിയത്. ഇവിടെ നടത്തിയ പരിശോധനയിലാണ് രണ്ട് മൃതദേഹങ്ങള്‍ പുറത്തെടുത്തത്.
അഴുകിയ നിലയിലായതിനാല്‍ ഡി.എന്‍.എ (പരിശോധനയ്‌ക്ക് ശേഷം മാത്രമേ ഔദ്യോഗിക സ്ഥിരീകരണം നല്‍കൂ എന്ന് പോലീസ് അറിയിച്ചു. മേരിക്കുട്ടിയുടെ ഇളയ മകന്‍ സജി നിലവില്‍ ഒളിവിലാണ്. ഇയാള്‍ക്കായി പോലീസ് തിരച്ചില്‍ ഊര്‍ജിതമാക്കി. മേരിക്കുട്ടിയും രണ്ട് മക്കളും ഒരേ വീട്ടിലായിരുന്നു താമസം. ഇവര്‍ക്കിടയില്‍ നിരന്തരം വഴക്കുകള്‍ പതിവായിരുന്നുവെന്ന് അയല്‍വാസികള്‍ മൊഴി നല്‍കിയിട്ടുണ്ട്.
വഴക്കിനിടെ സജി അമ്മയെയും സഹോദരനെയും വകവരുത്തി മൃതദേഹങ്ങള്‍ തെളിവ് നശിപ്പിക്കാനായി കുഴിച്ചുമൂടിയതാണെന്നാണ് പോലീസിന്റെ പ്രാഥമിക നിഗമനം. ഫോറന്‍സിക് വിദഗ്ധരും വിരലടയാള വിദഗ്ധരും സംഭവസ്ഥലത്തെത്തി തെളിവുകള്‍ ശേഖരിച്ചു. ഒളിവില്‍ പോയ സജിയെ കണ്ടെത്തിയാല്‍ മാത്രമേ കൊലപാതകത്തിന് പിന്നിലെ യഥാര്‍ത്ഥ കാരണവും കൃത്യം നടന്ന രീതിയും വ്യക്തമാകൂ. കേസ് അത്യന്തം ഗൗരവകരമാണ്. ഒളിവില്‍ പോയ പ്രതിയെ ഉടന്‍ പിടികൂടുമെന്ന് ഇടുക്കി ജില്ലാ പോലീസ് മേധാവി അറിയിച്ചു.
