ബെംഗളൂരു: വായനക്കാരുടെ പ്രിയപ്പെട്ട ഇടമായ ബെംഗളൂരു ചര്‍ച്ച് സ്ട്രീറ്റിലെ ‘ബുക്ക് വേം’ പുസ്തകശാലയില്‍ കനത്ത മഴയെത്തുടര്‍ന്ന് വന്‍ നാശനഷ്ടം. ബുധനാഴ്ച പെയ്ത അതിശക്തമായ മഴയില്‍ കടയ്‌ക്കുള്ളില്‍ വെള്ളം കയറിയതിനെത്തുടര്‍ന്ന് വില്‍പനയ്‌ക്കായി വച്ചിരുന്ന അയ്യായിരത്തോളം പുസ്തകങ്ങളാണ് ഉപയോഗശൂന്യമായത്. വേനലവധി സീസണ്‍ പ്രമാണിച്ച് കുട്ടികള്‍ക്കും മുതിര്‍ന്നവര്‍ക്കുമായി എത്തിച്ച പുതിയ പുസ്തകങ്ങളാണ് നശിച്ചവയില്‍ ഭൂരിഭാഗവുമെന്ന് ഉടമ കൃഷ്ണ പറഞ്ഞു. പുസ്തകങ്ങള്‍ വെള്ളത്തില്‍ ഒഴുകിനടക്കുന്നതും കടയുടെ പരിസരത്ത് ആലിപ്പഴം വീണുകിടക്കുന്നതുമായ ദൃശ്യങ്ങള്‍ സമൂഹമാധ്യമങ്ങളില്‍ വായനക്കാരുടെ കണ്ണ് നിറയ്‌ക്കുന്നതാണ്.
ഓയില്‍ പേപ്പറില്‍ അച്ചടിച്ച ആസ്റ്ററിക്‌സ്, ഒബലിക്‌സ് തുടങ്ങിയ ജനപ്രിയ ചിത്രകഥാ പുസ്തകങ്ങള്‍ പൂര്‍ണ്ണമായും നശിച്ചു. കടലാസിന്റെ ഗുണമേന്മയിലെ മാറ്റം കാരണം വെള്ളം നനഞ്ഞാല്‍ പുസ്തകങ്ങള്‍ വേഗത്തില്‍ ഒട്ടിപ്പോകുന്നത് രക്ഷാപ്രവര്‍ത്തനത്തിന് വെല്ലുവിളിയായി. ഭാഗികമായി മാത്രം നനഞ്ഞ പുസ്തകങ്ങള്‍ ഉണക്കിയെടുത്ത് വായനക്കാര്‍ക്ക് കുറഞ്ഞ വിലയ്‌ക്ക് നല്‍കാന്‍ ശ്രമിക്കുമെന്ന് അധികൃതര്‍ അറിയിച്ചു. പുസ്തകശാലയുടെ അവസ്ഥ അറിഞ്ഞതോടെ വായനക്കാര്‍ ലോകത്തിന്റെ വിവിധ ഭാഗങ്ങളില്‍ നിന്ന് പിന്തുണയുമായി രംഗത്തെത്തിയിട്ടുണ്ട്.
കൊല്‍ക്കത്തയിലെ കോളേജ് സ്ട്രീറ്റില്‍ പ്രളയമുണ്ടായപ്പോള്‍ നടത്തിയ ‘വെറ്റ് ബുക്ക് ഫെയര്‍’ മാതൃകയില്‍ നനഞ്ഞ പുസ്തകങ്ങള്‍ ഏറ്റെടുക്കാന്‍ തയ്യാറാണെന്ന് നിരവധിപ്പേര്‍ അറിയിച്ചു. ‘പുസ്തകങ്ങളുടെ അവസ്ഥ എന്തുതന്നെയായാലും അവ വാങ്ങാന്‍ ഞങ്ങള്‍ തയ്യാറാണ്. ഈ പുസ്തകശാലയുടെ തിരിച്ചുവരവിന് വായനക്കാരുടെ പിന്തുണ ഉണ്ടാകും.’ – സമൂഹമാധ്യമങ്ങളിലെ ഒരു കുറിപ്പ്. തങ്ങളുടെ പ്രിയപ്പെട്ട പുസ്തകശാലയെ പ്രതിസന്ധിയില്‍ നിന്ന് കരകയറ്റാന്‍ സന്നദ്ധരായി ആയിരക്കണക്കിന് വായനക്കാര്‍ എത്തിയത് ഉടമയ്‌ക്കും ജീവനക്കാര്‍ക്കും വലിയ ആശ്വാസമാണ് നല്‍കുന്നത്. വരും ദിവസങ്ങളില്‍ നനഞ്ഞ പുസ്തകങ്ങളുടെ പ്രദര്‍ശനവും വില്‍പനയും ബുക്ക് വേമില്‍ നടക്കുമെന്നാണ് സൂചന.
