ഇരിങ്ങാലക്കുട: തൃശ്ശൂര് ഇരിങ്ങാലക്കുട കൂടല്മാണിക്യം ക്ഷേത്രോത്സവത്തിനിടെ ആന ഇടഞ്ഞ് രണ്ടാം പാപ്പാന് കൊല്ലപ്പെട്ടു. ഇന്ന് ഉച്ചയോടെയാണ് നാടിനെ നടുക്കിയ ഈ സംഭവം ഉണ്ടായത്. പത്തനംതിട്ട സ്വദേശിയായ രണ്ടാം പാപ്പാന് ശ്രീക്കുട്ടന് (25) ആണ് മരിച്ചത്. വാഴ്വാടി കാശിനാഥന് എന്ന ആനയാണ് അക്രമാസക്തനായത്. വ്യാഴാഴ്ച രാത്രി നടന്ന വിളക്ക് എഴുന്നള്ളിപ്പിനിടെയും ആന അസ്വാഭാവിക സ്വഭാവം കാണിച്ചിരുന്നു. തുടര്ന്ന് സുരക്ഷ മുന്നിര്ത്തി പാപ്പാന്മാര് ആനയെ തളച്ച് കൊട്ടിലാക്കല് പറമ്പിലേക്ക് മാറ്റിയിരുന്നു.
എന്നാല് ഇന്ന് ഉച്ചയോടെ വീണ്ടും ഇടഞ്ഞ ആന, തളച്ചിരുന്ന പറമ്പിലെ താല്ക്കാലിക ഷെഡ് തകര്ക്കുകയും അവിടെയുണ്ടായിരുന്ന പാപ്പാന്മാരെ ആക്രമിക്കുകയുമായിരുന്നു. ആനയുടെ ആക്രമണത്തില് ഒന്നാം പാപ്പാന് അമലിനും (28) രണ്ടാം പാപ്പാന് ശ്രീക്കുട്ടനും ഗുരുതരമായി പരിക്കേറ്റു. ഉടന് തന്നെ ഇരുവരെയും ഇരിങ്ങാലക്കുട ജനറല് ആശുപത്രിയില് എത്തിച്ചെങ്കിലും നെഞ്ചിന് ചവിട്ടേറ്റ ശ്രീക്കുട്ടന് മരണത്തിന് കീഴടങ്ങി. അമല് നിലവില് ചികിത്സയിലാണ്.
സംസ്ഥാനത്ത് ഇന്ന് റിപ്പോര്ട്ട് ചെയ്യപ്പെടുന്ന രണ്ടാമത്തെ ആനപ്പകയാണിത്. രാവിലെ എറണാകുളം അങ്കമാലി കിടങ്ങൂരില് ആന ഇടഞ്ഞ് ലോറി ഡ്രൈവര് കൊല്ലപ്പെട്ടിരുന്നു. ഇതിന് പിന്നാലെ തൃശ്ശൂരിലുണ്ടായ ഈ അപകടം ഉത്സവപ്രേമികളെയും നാട്ടുകാരെയും ഒരുപോലെ ഭീതിയിലാഴ്ത്തിയിരിക്കുകയാണ്.
