ന്യൂഡല്‍ഹി: അഞ്ച് സംസ്ഥാനങ്ങളില്‍ നടന്ന നിയമസഭാ തെരഞ്ഞെടുപ്പുകളുടെ വോട്ടെണ്ണല്‍ പുരോഗമിക്കുമ്പോള്‍ ബിജെപി ക്യാമ്പുകളില്‍ ആവേശം. പശ്ചിമ ബംഗാള്‍, അസം എന്നിവിടങ്ങളില്‍ പാര്‍ട്ടി തകര്‍പ്പന്‍ മുന്നേറ്റമാണ് കാഴ്ചവെക്കുന്നത്. ബംഗാളില്‍ ഭരണകക്ഷിയായ തൃണമൂല്‍ കോണ്‍ഗ്രസിനെ ബഹുദൂരം പിന്നിലാക്കി ബിജെപി അധികാരം ഉറപ്പിക്കുന്ന കാഴ്ചയാണ് നിലവിലുള്ളത്. ദേശീയ രാഷ്‌ട്രീയത്തിലെ ഈ മാറ്റത്തെക്കുറിച്ച് ബിജെപി വക്താവ് അജയ് അലോക് നടത്തിയ പ്രതികരണം ഇതിനോടകം ശ്രദ്ധേയമായിക്കഴിഞ്ഞു. ‘മമത പോയി, ഗൊഗോയ് പോയി, സ്റ്റാലിനിസം പോയി; ഇനി ഇന്ത്യയില്‍ മോദിയുടെ ദേശീയത വിജയിക്കും’ എന്നായിരുന്നു അദ്ദേഹത്തിന്റെ വാക്കുകള്‍.
വിവിധ സംസ്ഥാനങ്ങളില്‍ നിന്നുള്ള ഫലസൂചനകള്‍ പ്രകാരം ബിജെപി ചരിത്രപരമായ വിജയത്തിലേക്കാണ് നീങ്ങുന്നത്. ആകെയുള്ള സീറ്റുകളില്‍ 191 ഇടങ്ങളിലും ബിജെപി മുന്നിലാണ്. മമത ബാനര്‍ജിയുടെ ടിഎംസി 97 സീറ്റുകളിലേക്ക് ഒതുങ്ങി. ബംഗാളില്‍ ആദ്യമായി ഒരു ബിജെപി സര്‍ക്കാര്‍ അധികാരത്തിലേറുമെന്ന ആത്മവിശ്വാസത്തിലാണ് പ്രവര്‍ത്തകര്‍. ബിജെപി സഖ്യം 99 സീറ്റുകളില്‍ ലീഡ് നിലനിര്‍ത്തുന്നു. ഇവിടെ കോണ്‍ഗ്രസ് കേവലം 24 സീറ്റുകളില്‍ മാത്രമാണ് മുന്നിലുള്ളത്. മറ്റ് സംസ്ഥാനങ്ങളില്‍ തിരിച്ചടി നേരിട്ടെങ്കിലും കോണ്‍ഗ്രസ് കേരളത്തില്‍ നില മെച്ചപ്പെടുത്തിയിട്ടുണ്ട്.
തെരഞ്ഞെടുപ്പ് ഫലങ്ങള്‍ പുറത്തുവരുന്നതോടെ ഡല്‍ഹിയിലെ ബിജെപി ആസ്ഥാനത്ത് ആഘോഷങ്ങള്‍ ആരംഭിച്ചു കഴിഞ്ഞു. പ്രതിപക്ഷ പാര്‍ട്ടികളുടെ കോട്ടകള്‍ തകര്‍ത്ത് ബിജെപി മുന്നേറുന്നത് ദേശീയതലത്തില്‍ വലിയ രാഷ്‌ട്രീയ മാറ്റങ്ങള്‍ക്ക് വഴിതുറക്കുമെന്നാണ് വിലയിരുത്തപ്പെടുന്നത്. പശ്ചിമ ബംഗാളിലെയും അസമിലെയും മികച്ച പ്രകടനം പ്രവര്‍ത്തകര്‍ക്കിടയില്‍ വലിയ ആവേശം സൃഷ്ടിച്ചിട്ടുണ്ട്.
