കൊല്‍ക്കത്ത: പശ്ചിമ ബംഗാളിലെ റെയില്‍വേ അടിസ്ഥാന സൗകര്യങ്ങള്‍ മെച്ചപ്പെടുത്തുന്നതിനായി 895.30 കോടി രൂപയുടെ ബൃഹദ് പദ്ധതികള്‍ക്ക് റെയില്‍വേ മന്ത്രാലയം അനുമതി നല്‍കി. ലൈന്‍ ശേഷി വര്‍ദ്ധിപ്പിക്കുക, ചരക്ക് നീക്കം സുഗമമാക്കുക, യാത്രക്കാരുടെ സുരക്ഷയും സൗകര്യങ്ങളും ഉറപ്പാക്കുക എന്നിവയാണ് ഈ പദ്ധതികളുടെ പ്രധാന ലക്ഷ്യം. ഇന്ത്യയിലെ ഏറ്റവും പഴയ മെട്രോ ശൃംഖലയായ കൊല്‍ക്കത്ത മെട്രോയുടെ നോര്‍ത്ത്-സൗത്ത് കോറിഡോറിലാണ് പ്രധാനമായും നവീകരണ പ്രവര്‍ത്തനങ്ങള്‍ നടക്കുക. ഇതിനായി 671.72 കോടി രൂപയാണ് നല്‍കിയിരിക്കുന്നത്. 291.06 കോടി രൂപ ചെലവില്‍ 7 പുതിയ ട്രാക്ഷന്‍ സബ്‌സ്റ്റേഷനുകള്‍ സ്ഥാപിക്കും.
എസ്പ്ലനേഡ് മെട്രോ മുതല്‍ കവി സുഭാഷ് വരെയുള്ള ഭാഗത്തെ സബ്‌സ്റ്റേഷനുകള്‍ 380.66 കോടി രൂപ ചെലവില്‍ നവീകരിക്കും. നിലവിലുള്ള 11 കെവി സംവിധാനം 33 കെവി ആയി ഉയര്‍ത്തുന്നതും ഇതില്‍ ഉള്‍പ്പെടുന്നു. ഈ നവീകരണം പൂര്‍ത്തിയാകുന്നതോടെ മെട്രോ ട്രെയിനുകള്‍ തമ്മിലുള്ള സമയക്രമം നിലവിലുള്ള 5 മിനിറ്റില്‍ നിന്നും 2.5 മിനിറ്റായി കുറയ്‌ക്കാന്‍ സാധിക്കും. ഇത് മെട്രോയിലെ തിരക്ക് കുറയ്‌ക്കാനും കൂടുതല്‍ സര്‍വീസുകള്‍ നടത്താനും സഹായിക്കും. സൗത്ത് ഈസ്റ്റേണ്‍ റെയില്‍വേയ്‌ക്ക് കീഴിലുള്ള അദ്ര ഡിവിഷനിലെ മധുകുണ്ഡ-ദാമോദര്‍ സെക്ഷനില്‍ പുതിയ പാലം നിര്‍മ്മിക്കുന്നതിനായി 223.58 കോടി രൂപ അനുവദിച്ചു.
1903-ലും 1965-ലുമായി നിര്‍മ്മിച്ച പഴയ ദാമോദര്‍ പാലത്തിന് പകരം അത്യാധുനിക രീതിയിലുള്ള പുതിയ സബ് സ്ട്രക്ചറുകള്‍ നിര്‍മ്മിക്കും. പഴയ പാലത്തിന് ബലക്ഷയം കണ്ടെത്തിയ സാഹചര്യത്തിലാണ് പുനര്‍നിര്‍മ്മാണം. അസന്‍സോളിനെയും ടാറ്റാനഗറിനെയും ബന്ധിപ്പിക്കുന്ന നിര്‍ണ്ണായക പാതയാണിത്. ചരക്ക് നീക്കത്തിനും കല്‍ക്കരി ഗതാഗതത്തിനും ഏറെ പ്രാധാന്യമുള്ള ഈ റൂട്ടിലെ സുരക്ഷയും വേഗതയും വര്‍ദ്ധിപ്പിക്കാന്‍ പുതിയ പാലം സഹായിക്കും. ഈ വന്‍കിട പദ്ധതികള്‍ വരും വര്‍ഷങ്ങളില്‍ ബംഗാളിലെ ട്രെയിന്‍ യാത്ര കൂടുതല്‍ ആധുനികവും സുരക്ഷിതവുമാക്കുമെന്ന് റെയില്‍വേ മന്ത്രാലയം അറിയിച്ചു.
