പത്തനംതിട്ട: അടൂരില് 28 വയസ്സുകാരിയെ അയല്വാസിയായ ഓട്ടോറിക്ഷാ ഡ്രൈവര് മാസങ്ങളോളം ക്രൂരമായി പീഡിപ്പിക്കുകയും മര്ദ്ദിക്കുകയും ചെയ്തതായി പരാതി. ലഹരി കലര്ന്ന പാനീയം നല്കി പീഡിപ്പിച്ച ശേഷം നഗ്നദൃശ്യങ്ങള് പകര്ത്തി ഭീഷണിപ്പെടുത്തിയായിരുന്നു തുടര്ച്ചയായ അതിക്രമം. സംഭവത്തില് പത്തനംതിട്ട ജില്ലാ പോലീസ് മേധാവിക്കും അടൂര് പോലീസിനും യുവതി പരാതി നല്കി.
ഭര്ത്താവുമായി അകന്നു കഴിയുന്ന യുവതി ഫെബ്രുവരിയിലാണ് ആദ്യമായി പീഡനത്തിനിരയായത്. വീട്ടിലേക്ക് പോകാന് പതിവായി വിളിക്കാറുള്ള അയല്ക്കാരന്റെ ഓട്ടോയില് കയറിയ യുവതിയെ പ്രതി കബളിപ്പിക്കുകയായിരുന്നു. ഡ്രൈവിംഗ് ലൈസന്സ് എടുക്കാന് മറന്നുവെന്ന് പറഞ്ഞ് സ്വന്തം വീട്ടിലേക്ക് യുവതിയെ നിര്ബന്ധിച്ച് കൊണ്ടുപോയി. അവിടെ വെച്ച് ലഹരി കലര്ന്ന ജ്യൂസ് നല്കി ബോധരഹിതയാക്കിയ ശേഷം ബലാത്സംഗം ചെയ്യുകയായിരുന്നുവെന്ന് പരാതിയില് പറയുന്നു.
പീഡന ദൃശ്യങ്ങള് മൊബൈല് ഫോണില് പകര്ത്തിയ പ്രതി, ഇത് പുറത്തുവിടുമെന്ന് ഭീഷണിപ്പെടുത്തി പല സ്ഥലങ്ങളില് കൊണ്ടുപോയി പീഡനം ആവര്ത്തിച്ചു. ഇയാളുടെ ശല്യം സഹിക്കവയ്യാതെ യുവതി പ്രതിയുടെ ഭാര്യയോട് കാര്യങ്ങള് തുറന്നുപറഞ്ഞു. ഇതോടെ പ്രകോപിതനായ പ്രതി കഴിഞ്ഞ മാസം യുവതിയെ ക്രൂരമായ മര്ദ്ദനത്തിന് ഇരയാക്കി. ഒരു ടാങ്കര് ലോറിയില് യുവതിയെ നിര്ബന്ധിച്ച് കയറ്റിക്കൊണ്ടുപോയി അതിക്രൂരമായി ഉപദ്രവിക്കുകയായിരുന്നു.
അക്രമം സഹിക്കവയ്യാതെ വന്നതോടെയാണ് ഭയപ്പാടിലായിരുന്ന യുവതി പോലീസിനെ സമീപിക്കാന് തീരുമാനിച്ചത്. യുവതിയുടെ മൊഴി രേഖപ്പെടുത്തിയ അടൂര് പോലീസ് സംഭവത്തില് കേസെടുത്ത് അന്വേഷണം ഊര്ജിതമാക്കിയിട്ടുണ്ട്. പ്രതിക്കായി തെരച്ചില് തുടരുകയാണെന്ന് പോലീസ് അറിയിച്ചു.
