കൊല്‍ക്കത്ത: പശ്ചിമ ബംഗാള്‍ മുഖ്യമന്ത്രി സുവേന്ദു അധികാരി നന്ദിഗ്രാം എംഎല്‍എ സ്ഥാനം രാജിവെച്ചു. നിയമസഭാ തിരഞ്ഞെടുപ്പില്‍ മത്സരിച്ച രണ്ട് മണ്ഡലങ്ങളിലും വിജയിച്ച സാഹചര്യത്തിലാണ് പത്ത് ദിവസത്തിനുള്ളില്‍ ഒരൊറ്റ മണ്ഡലം തിരഞ്ഞെടുക്കണമെന്ന വ്യവസ്ഥ പ്രകാരം അദ്ദേഹം നന്ദിഗ്രാം ഒഴിഞ്ഞത്. മമത ബാനര്‍ജിയെ പരാജയപ്പെടുത്തിയ ഭവാനിപൂര്‍ മണ്ഡലം സുവേന്ദു നിലനിര്‍ത്തും.
രണ്ട് മണ്ഡലങ്ങളിലും മികച്ച ഭൂരിപക്ഷം നേടിയെങ്കിലും ഭവാനിപൂര്‍ കേന്ദ്രീകരിച്ച് പ്രവര്‍ത്തിക്കാനാണ് ബിജെപി കേന്ദ്ര നേതൃത്വം സുവേന്ദുവിന് നല്‍കിയ നിര്‍ദ്ദേശം. കൊല്‍ക്കത്തയുടെ ഹൃദയഭാഗമായ ഭവാനിപൂര്‍ കൈവശം വെക്കുന്നത് വഴി സര്‍ക്കാരിന് തലസ്ഥാന നഗരത്തില്‍ കൂടുതല്‍ പിടിമുറുക്കാന്‍ സാധിക്കുമെന്ന് ബിജെപി കണക്കുകൂട്ടുന്നു. ഭവാനിപൂരില്‍ മമത ബാനര്‍ജിയെ 15,105 വോട്ടുകള്‍ക്കാണ് സുവേന്ദു പരാജയപ്പെടുത്തിയത്. നന്ദിഗ്രാമില്‍ 9,665 വോട്ടുകള്‍ക്കായിരുന്നു അദ്ദേഹത്തിന്റെ വിജയം.
തന്റെ രാഷ്‌ട്രീയ ജീവിതത്തിലെ നിര്‍ണ്ണായക കേന്ദ്രമായ നന്ദിഗ്രാം വിടുന്നത് വൈകാരികമായ തീരുമാനമാണെന്ന് സുവേന്ദു അധികാരി സോഷ്യല്‍ മീഡിയയില്‍ കുറിച്ചു. ‘എവിടെയായിരുന്നാലും ഹൃദയം എന്നും നന്ദിഗ്രാമിനൊപ്പമുണ്ടാകും. നന്ദിഗ്രാമിലെ ജനങ്ങളോടുള്ള കടപ്പാട് എന്നും നിലനിര്‍ത്തും,’ എന്ന് അദ്ദേഹം വ്യക്തമാക്കി. സുവേന്ദു അധികാരിയുടെ രാജിയോടെ നന്ദിഗ്രാമില്‍ ഉപതിരഞ്ഞെടുപ്പിന് കളമൊരുങ്ങി. പശ്ചിമ ബംഗാള്‍ രാഷ്‌ട്രീയത്തില്‍ വലിയ ചര്‍ച്ചയായ ഈ മണ്ഡലത്തില്‍ ബിജെപി ആരെയാകും പകരക്കാരനായി ഇറക്കുക എന്നത് രാഷ്‌ട്രീയ കേന്ദ്രങ്ങള്‍ ഉറ്റുനോക്കുകയാണ്.
മെയ് 4-ന് പുറത്തുവന്ന തിരഞ്ഞെടുപ്പ് ഫലത്തില്‍ ബിജെപി ചരിത്രവിജയം നേടിയതോടെയാണ് സുവേന്ദു അധികാരി ബംഗാള്‍ മുഖ്യമന്ത്രിയായി ചുമതലയേറ്റത്.
