കോഴിക്കോട്: പേരാമ്പ്ര ചെറുവണ്ണൂരില് ഗര്ഭിണിയായ യുവതിയുടെ മരണത്തിനിടയാക്കിയ കാര് അപകടത്തില് അന്വേഷണം ഊര്ജ്ജിതം. വാഹനത്തിന് തീപിടിച്ചത് ഷോര്ട്ട് സര്ക്യൂട്ട് മൂലമാകാന് സാധ്യതയില്ലെന്നാണ് മോട്ടോര് വാഹന വകുപ്പിന്റെ പ്രാഥമിക നിഗമനം. കാറിന്റെ പിന്ഭാഗത്തുനിന്നാണ് തീ പടര്ന്നതെന്ന സൂചനകളാണ് ഉദ്യോഗസ്ഥര്ക്ക് ലഭിച്ചിട്ടുള്ളത്.
തീപിടിത്തത്തിന്റെ കൃത്യമായ കാരണം കണ്ടെത്താന് മോട്ടോര് വാഹന വകുപ്പിന് പിന്നാലെ ഫോറന്സിക് വിദഗ്ധരും പരിശോധന നടത്തി. വാഹനത്തിന്റെ ഇന്ധന ടാങ്ക്, പിന്സീറ്റിലെ ഘടകങ്ങള് എന്നിവ കേന്ദ്രീകരിച്ചാണ് നിലവില് അന്വേഷണം നടക്കുന്നത്. ഫോറന്സിക് റിപ്പോര്ട്ട് ലഭിക്കുന്നതോടെ മാത്രമേ ദുരന്തത്തിന്റെ യഥാര്ത്ഥ കാരണം ഔദ്യോഗികമായി സ്ഥിരീകരിക്കാനാകൂ.
വ്യാഴാഴ്ച രാത്രി ഒന്പതരയോടെയാണ് നാടിനെ നടുക്കിയ അപകടം നടന്നത്. ഡോക്ടറെ കണ്ട ശേഷം ഭര്ത്താവിനൊപ്പം മടങ്ങുകയായിരുന്ന ചെറുവണ്ണൂര് സ്വദേശി സോനയാണ് അപകടത്തില് മരിച്ചത്. കാറിനുള്ളില് കുടുങ്ങിപ്പോയ സോനയെ രക്ഷിക്കാന് നാട്ടുകാര് കിണഞ്ഞു പരിശ്രമിച്ചെങ്കിലും സാധിച്ചില്ല. ഗുരുതരമായി പൊള്ളലേറ്റ ഭര്ത്താവ് ചികിത്സയിലാണ്.
ഓടിക്കൊണ്ടിരുന്ന കാറില് നിന്ന് പുക ഉയരുന്നത് കണ്ട് ഓടിക്കൂടിയ നാട്ടുകാര് അവിശ്വസനീയമായ വേഗതയിലാണ് രക്ഷാപ്രവര്ത്തനത്തിന് ഇറങ്ങിയത്. സമീപത്തെ വയലില് നിന്ന് വെള്ളം കോരിയൊഴിച്ച് തീ കെടുത്താന് ശ്രമിച്ചെങ്കിലും കാറിനുള്ളിലെ ചൂടും പുകയും രക്ഷാപ്രവര്ത്തനത്തിന് വലിയ തടസ്സമായി. ദമ്പതികള് വാഹനത്തിനുള്ളില് കുടുങ്ങിയ നിലയിലായിരുന്നു.
കാറിന്റെ സാങ്കേതിക വശങ്ങളും ഇന്ധന പൈപ്പുകളിലുണ്ടായേക്കാവുന്ന തകരാറുകളും വിദഗ്ധ സംഘം പരിശോധിച്ചുവരികയാണ്. ഇത്തരം അപകടങ്ങള് ഒഴിവാക്കാന് പഴയ വാഹനങ്ങളുടെയും ഇന്ധന ടാങ്കുകളുടെയും സുരക്ഷാ പരിശോധന കര്ശനമാക്കണമെന്ന് അധികൃതര് മുന്നറിയിപ്പ് നല്കി.
