ന്യൂഡല്‍ഹി: ഡല്‍ഹി മദ്യനയക്കേസ് നടപടികളുമായി ബന്ധപ്പെട്ട് തനിക്കെതിരെ സോഷ്യല്‍ മീഡിയയില്‍ ആസൂത്രിത പ്രചാരണം നടത്തിയെന്ന പരാതിയില്‍ ആം ആദ്മി പാര്‍ട്ടി (എഎപി) നേതാക്കള്‍ക്കെതിരെ ഡല്‍ഹി ഹൈക്കോടതി ക്രിമിനല്‍ കോടതിയലക്ഷ്യ നടപടികള്‍ക്ക് നോട്ടീസ് അയച്ചു. ജസ്റ്റിസ് സ്വര്‍ണ കാന്ത ശര്‍മ്മ നല്‍കിയ പരാതിയുടെ അടിസ്ഥാനത്തിലാണ് എഎപി നേതാക്കളായ അരവിന്ദ് കെജ്രിവാള്‍, മനീഷ് സിസോദിയ, സഞ്ജയ് സിംഗ് തുടങ്ങിയവര്‍ക്കെതിരെ കോടതി നോട്ടീസ് പുറപ്പെടുവിച്ചത്.
ജസ്റ്റിസ് നവിന്‍ ചൗള, ജസ്റ്റിസ് രവീന്ദര്‍ ദുദേജ എന്നിവരടങ്ങിയ ഡിവിഷന്‍ ബെഞ്ചാണ് ചൊവ്വാഴ്ച കേസ് പരിഗണിച്ചതും നാലാഴ്ചയ്‌ക്കകം മറുപടി നല്‍കാന്‍ നേതാക്കളോട് ആവശ്യപ്പെട്ടതും. എക്‌സൈസ് നയക്കേസിലെ ജഡ്ജിയുടെ പെരുമാറ്റത്തെ ചോദ്യം ചെയ്തുകൊണ്ട് അരവിന്ദ് കെജ്രിവാളും മറ്റ് നേതാക്കളും പങ്കുവെച്ച സോഷ്യല്‍ മീഡിയ പോസ്റ്റുകള്‍ ശ്രദ്ധയില്‍പ്പെട്ടതിനെ തുടര്‍ന്നാണ് ജസ്റ്റിസ് ശര്‍മ്മ കോടതിയലക്ഷ്യ നടപടികള്‍ക്ക് തുടക്കമിട്ടത്.
മദ്യനയക്കേസില്‍ കെജ്രിവാള്‍ ഉള്‍പ്പെടെയുള്ള 22 പ്രതികളെ വിചാരണക്കോടതി നേരത്തെ കുറ്റവിമുക്തരാക്കിയിരുന്നു. സിബിഐയുടെ അന്വേഷണ രീതിയെ കടുത്ത ഭാഷയില്‍ വിമര്‍ശിച്ചുകൊണ്ടായിരുന്നു വിചാരണക്കോടതിയുടെ അന്നത്തെ വിധി. എന്നാല്‍, ഈ ഉത്തരവിനെതിരെ സിബിഐ പിന്നീട് ഡല്‍ഹി ഹൈക്കോടതിയില്‍ അപ്പീല്‍ നല്‍കി.
ഈ അപ്പീല്‍ പരിഗണിക്കുന്നതില്‍ നിന്ന് ജസ്റ്റിസ് സ്വര്‍ണ കാന്ത ശര്‍മ്മ പിന്മാറണമെന്ന് ആവശ്യപ്പെട്ട് കെജ്രിവാളും സിസോദിയയും ഉള്‍പ്പെടെയുള്ള പ്രതികള്‍ അപേക്ഷ നല്‍കിയിരുന്നു. ജഡ്ജിക്ക് മുന്‍വിധിയുണ്ടെന്നായിരുന്നു എഎപി നേതാക്കളുടെ ആരോപണം. എന്നാല്‍, ഈ ആവശ്യങ്ങള്‍ തള്ളിയ ജസ്റ്റിസ് ശര്‍മ്മ, എഎപി നേതൃത്വത്തിന്റെ ആരോപണങ്ങള്‍ അപകീര്‍ത്തികരമാണെന്ന് വ്യക്തമാക്കുകയും അവര്‍ക്കെതിരെ കോടതിയലക്ഷ്യ നടപടികള്‍ ആരംഭിക്കുകയുമായിരുന്നു.
ജഡ്ജിയുമായുള്ള തര്‍ക്കം മുറുകിയതോടെ, ജസ്റ്റിസ് ശര്‍മ്മയുടെ കോടതിയിലെ വാദങ്ങളില്‍ തങ്ങള്‍ പങ്കെടുക്കില്ലെന്ന് കെജ്രിവാളും സിസോദിയയും നിലപാടെടുത്തു. ഇതേത്തുടര്‍ന്ന് ജസ്റ്റിസ് ശര്‍മ്മ നിലവില്‍ ഈ സിബിഐ കേസ് മറ്റൊരു ബെഞ്ചിലേക്ക് മാറ്റിയിട്ടുണ്ട്.
കേസ് പുതിയ ബെഞ്ചിലേക്ക് മാറ്റിയ വിവരവും, വാദത്തില്‍ പങ്കെടുക്കാന്‍ താല്‍പ്പര്യമുണ്ടോ എന്ന കാര്യവും കെജ്രിവാള്‍, സിസോദിയ, ദുര്‍ഗേഷ് പഥക് എന്നിവരെ അറിയിക്കാന്‍ സോളിസിറ്റര്‍ ജനറല്‍ തുഷാര്‍ മേത്തയോട് ചൊവ്വാഴ്ച കോടതി നിര്‍ദ്ദേശിച്ചു. തങ്ങളെ കുറ്റവിമുക്തരാക്കിയതിനെതിരെ സിബിഐ നല്‍കിയ അപ്പീലില്‍ വരും തിങ്കളാഴ്ചയ്‌ക്കകം മറുപടി നല്‍കാനും എഎപി നേതാക്കളോട് കോടതി ആവശ്യപ്പെട്ടിട്ടുണ്ട്.
