സാന്റോസ്: ബ്രസീലിയന് ഫുട്ബോളിന്റെ സാംബാ പ്രതാപം തിരികെപ്പിടിക്കാന് സൂപ്പര് താരം നെയ്മര് ജൂനിയര് വീണ്ടുമെത്തുന്നു. വരാനിരിക്കുന്ന 2026 ഫിഫ ലോകകപ്പിനുള്ള കാനറികളുടെ അന്തിമ സ്ക്വാഡില് നെയ്മറെ ഉള്പ്പെടുത്തിയതോടെ, ആറാം കനകകിരീടം സ്വപ്നം കാണുന്ന ആരാധകര് വലിയ ആവേശത്തിലാണ്. നീണ്ട മൂന്ന് വര്ഷത്തെ ഇടവേളയ്ക്ക് ശേഷമുള്ള താരത്തിന്റെ ഈ തിരിച്ചുവരവ് ഏറെ വൈകാരികമായ നിമിഷങ്ങള്ക്കാണ് സാക്ഷ്യം വഹിച്ചത്.
പരിശീലകന് കാര്ലോ ആഞ്ചലോട്ടി ലോകകപ്പ് ടീമിനെ പ്രഖ്യാപിക്കുന്നത് സ്വന്തം ബംഗ്ലാവിലിരുന്ന് ഉദ്വേഗത്തോടെ വീക്ഷിക്കുന്ന നെയ്മറുടെ വീഡിയോ ഇതിനകം തന്നെ സോഷ്യല് മീഡിയയില് തരംഗമായിക്കഴിഞ്ഞു. ഏകദേശം 20 കോടിയോളം ആളുകളാണ് ഈ ദൃശ്യങ്ങള് കണ്ടത്. ടീം പ്രഖ്യാപന സമയത്ത് മൂന്ന് വര്ഷത്തെ ഇടവേളയുടെ വലിയ സമ്മര്ദ്ദം 34-കാരനായ താരത്തിന്റെ മുഖത്ത് വ്യക്തമായിരുന്നു. പങ്കാളി ബ്രൂണ ബിയാന്കാര്ഡിയും കുടുംബാംഗങ്ങളും സുഹൃത്തുക്കളും ശ്വാസമടക്കിയാണ് ടിവി സ്ക്വാഡിന് മുന്നിലിരുന്നത്.
🥺🇧🇷 The moment when Neymar Jr got called up by Carlo Ancelotti…@neymarjr 🎥 pic.twitter.com/xFIxeMh4nw
— Fabrizio Romano (@FabrizioRomano) May 19, 2026
ഒടുവില് ആഞ്ചലോട്ടി നെയ്മറുടെ പേര് ഔദ്യോഗികമായി അനൗണ്സ് ചെയ്തതോടെ ബംഗ്ലാവ് ആഹ്ലാദക്കടലായി മാറി. സന്തോഷം അടക്കാനാവാതെ കണ്ണീരണിഞ്ഞ താരം തന്റെ ഉറ്റസുഹൃത്ത് റഫീഞ്ഞയെയും അച്ഛനെയും കെട്ടിപ്പിടിച്ചാണ് ഈ ചരിത്ര നിമിഷം ആഘോഷിച്ചത്. 2023 ഒക്ടോബറില് ഉറുഗ്വേയ്ക്കെതിരായ ലോകകപ്പ് യോഗ്യതാ മത്സരത്തിനിടെയേറ്റ കടുത്ത പരിക്കാണ് നെയ്മറെ ടീമില് നിന്ന് ഏറെക്കാലം അകറ്റിനിര്ത്തിയത്. തുടര്ന്നുണ്ടായ വിവാദങ്ങളും കാര്ലോ ആഞ്ചലോട്ടി ചുമതലയേറ്റ ശേഷമുള്ള അവഗണനകളും താരത്തിന് തിരിച്ചടിയായിരുന്നു. എന്നാല് കഠിനമായ തിരിച്ചുവരവിലൂടെ ഇറ്റാലിയന് പരിശീലകന്റെ ലോകകപ്പ് പദ്ധതികളില് ഇടംപിടിക്കാന് ‘സുല്ത്താന്’ സാധിച്ചു.
ബ്രസീലിനായി കളിച്ച 128 മത്സരങ്ങളില് നിന്ന് 79 ഗോളുകള് നേടിയിട്ടുള്ള നെയ്മറാണ് നിലവില് രാജ്യത്തിന്റെ എക്കാലത്തെയും മികച്ച ഗോള്വേട്ടക്കാരന്. പങ്കെടുത്ത മൂന്ന് ലോകകപ്പുകളിലെ (2014, 2018, 2022) 13 മത്സരങ്ങളില് നിന്ന് എട്ട് ഗോളുകളും താരം അക്കൗണ്ടിലാക്കിയിട്ടുണ്ട്. 24 വര്ഷത്തെ നീണ്ട ഇടവേളയ്ക്ക് ശേഷം ലോകകപ്പ് കിരീടം ബ്രസീലില് എത്തിക്കുമെന്ന ഉറച്ച വാഗ്ദാനവുമായാണ് നെയ്മര് ഇത്തവണ കളത്തിലിറങ്ങുന്നത്.
