ന്യൂഡല്ഹി: ലക്ഷക്കണക്കിന് വിദ്യാര്ത്ഥികളെ പ്രതിസന്ധിയിലാക്കിയ 2026-ലെ നീറ്റ്-യുജി പരീക്ഷാ പേപ്പര് ചോര്ച്ചയ്ക്കും ക്രമക്കേടുകള്ക്കും പിന്നാലെ ദേശീയ പരീക്ഷാ ഏജന്സിയില് വന് അഴിച്ചുപണി. പരീക്ഷാ നടത്തിപ്പ് പരിഷ്കരിക്കുന്നതിനായി കേന്ദ്ര സര്ക്കാര് നിയോഗിച്ച ഉയര്ന്ന തലത്തിലുള്ള വിദഗ്ധ സമിതിയുടെ (രാധാകൃഷ്ണന് കമ്മിറ്റി) ശുപാര്ശകളുടെ അടിസ്ഥാനത്തിലാണ് ഭരണപരമായ നേതൃത്വം ശക്തമാക്കാനും സുതാര്യത ഉറപ്പാക്കാനുമുള്ള നിര്ണ്ണായക നടപടികള് എന്ടിഎ പ്രഖ്യാപിച്ചത്.
മേയ് 3-ന് നടന്ന നീറ്റ്-യുജി പരീക്ഷ ക്രമക്കേടുകളെ തുടര്ന്ന് റദ്ദാക്കിയത് 22 ലക്ഷത്തിലധികം ഉദ്യോഗാര്ത്ഥികളെ ബാധിക്കുകയും ഏജന്സി കടുത്ത പ്രതിസന്ധി നേരിടുകയും ചെയ്യുന്ന പശ്ചാത്തലത്തിലാണ് ഈ പരിഷ്കാരങ്ങള്. പ്രതിവര്ഷം ഒരു കോടിയിലധികം ഉദ്യോഗാര്ത്ഥികള് എഴുതുന്ന പരീക്ഷകളുടെ വിശ്വാസ്യതയും കാര്യക്ഷമതയും വീണ്ടെടുക്കുകയാണ് ലക്ഷ്യമെന്ന് എന്ടിഎ ഔദ്യോഗിക പ്രസ്താവനയില് അറിയിച്ചു.
ഏജന്സിയുടെ അഡ്മിനിസ്ട്രേറ്റീവ് നേതൃത്വം ശക്തമാക്കുന്നതിന്റെ ഭാഗമായി കേന്ദ്ര സര്ക്കാര് കഴിഞ്ഞ ദിവസങ്ങളില് നാല് മുതിര്ന്ന ഉദ്യോഗസ്ഥരെ എന്ടിഎയില് നിയമിച്ചു. ഇതില് രണ്ട് ജോയിന്റ് സെക്രട്ടറി തലത്തിലുള്ള ഉദ്യോഗസ്ഥരും രണ്ട് ഡയറക്ടര് തലത്തിലുള്ള ഉദ്യോഗസ്ഥരും ഉള്പ്പെടുന്നു. രാധാകൃഷ്ണന് കമ്മിറ്റിയുടെ ശുപാര്ശ പ്രകാരം ജോയിന്റ് സെക്രട്ടറി തലത്തിലുള്ള ഉദ്യോഗസ്ഥര് ഏജന്സിയില് അഡീഷണല് ഡയറക്ടര് ജനറല്മാരായി സേവനമനുഷ്ഠിക്കും.
കേന്ദ്ര സര്വീസുകളില് വിപുലമായ ഭരണപരിചയമുള്ള ഇവരുടെ വരവ് എന്ടിഎയുടെ പ്രവര്ത്തന ശേഷി വര്ദ്ധിപ്പിക്കുമെന്നാണ് പ്രതീക്ഷിക്കുന്നത്. സ്ഥാപനത്തെ ആധുനികവത്കരിക്കുന്നതിനായി സാങ്കേതികവിദ്യ, ധനകാര്യം, മനുഷ്യവിഭവശേഷി എന്നീ മേഖലകളില് ഉയര്ന്ന വൈദഗ്ധ്യമുള്ള പ്രൊഫഷണലുകളെ നിയമിക്കാന് എന്ടിഎ അപേക്ഷ ക്ഷണിച്ചു. ചോദ്യപേപ്പര് മാനേജ്മെന്റ്, സൈബര് സുരക്ഷ, ബയോമെട്രിക്-ഫേസ് ഒഥന്റിക്കേഷന്, എഐ (ആര്ട്ടിഫിഷ്യല് ഇന്റലിജന്സ്) അധിഷ്ഠിത സുരക്ഷാ നിയന്ത്രണങ്ങള് എന്നിവയുള്പ്പെടെയുള്ള ഡിജിറ്റല് പരീക്ഷാ സംവിധാനത്തിന്റെ പൂര്ണ്ണ ചുമതല ചീഫ് ടെക്നോളജി ഓഫീസര് തസ്തികയിലുള്ളയാള്ക്കായിരിക്കും.
ഓരോ പരീക്ഷയുടെയും അക്കൗണ്ടിംഗ്, ഓഡിറ്റിംഗ്, സാമ്പത്തിക ഭരണം എന്നിവ ചീഫ് ഫിനാന്ഷ്യല് ഓഫീസര് നിയന്ത്രിക്കും. ഏജന്സിയിലെ സ്ഥിരവും കരാര് അടിസ്ഥാനത്തിലുള്ളതുമായ ജീവനക്കാരുടെ മാനേജ്മെന്റ്, ജീവനക്കാരുടെ നയരൂപീകരണം എന്നിവ ജനറല് മാനേജര് മേല്നോട്ടം വഹിക്കും. ഔദ്യോഗിക വെബ്സൈറ്റില് പരസ്യം വന്ന് 15 ദിവസത്തിനകം താല്പ്പര്യമുള്ളവര്ക്ക് അപേക്ഷിക്കാം. കേന്ദ്ര സര്ക്കാര് സംവിധാനങ്ങളില് മുന്പരിചയമുള്ളവര്ക്കായിരിക്കും മുന്ഗണന.
ചോദ്യപേപ്പര് തയ്യാറാക്കല്, വിവര്ത്തനം, അച്ചടി, വിതരണം എന്നിവയിലെല്ലാം സുരക്ഷാ സാങ്കേതികവിദ്യകള് ഉറപ്പാക്കിക്കൊണ്ടുള്ള മാറ്റങ്ങളാണ് വരുത്തുന്നത്. ആര്ട്ടിഫിഷ്യല് ഇന്റലിജന്സ് അനലിറ്റിക്സ്, ബയോമെട്രിക് പരിശോധന, സുരക്ഷിതമായ ഡിജിറ്റല് ഇന്ഫ്രാസ്ട്രക്ചര് എന്നിവ വഴി പരീക്ഷാ പ്രക്രിയ പൂര്ണ്ണമായും നിരീക്ഷിക്കും. പരാതി പരിഹാര സംവിധാനങ്ങള് മെച്ചപ്പെടുത്തുമെന്നും ഉദ്യോഗാര്ത്ഥികളുമായുള്ള ആശയവിനിമയത്തില് കൂടുതല് സുതാര്യത കൊണ്ടുവരുമെന്നും എന്ടിഎ അറിയിച്ചു. കേന്ദ്ര വിദ്യാഭ്യാസ മന്ത്രാലയത്തിന്റെയും ഉന്നത വിദ്യാഭ്യാസ വകുപ്പിന്റെയും മേല്നോട്ടത്തിലായിരിക്കും തുടര്നടപടികള്.
