തിരുവനന്തപുരം: കേരള നിയമസഭയുടെ സത്യപ്രതിജ്ഞാ ചടങ്ങിലേക്ക് ബിജെപി ജനപ്രതിനിധികള് എത്തുന്നത് വിപുലമായ ജനകീയ പങ്കാളിത്തത്തോടെയുള്ള പ്രകടനവുമായി. വ്യാഴാഴ്ച രാവിലെ 8 മണിക്ക് പാര്ട്ടി സംസ്ഥാന കാര്യാലയമായ കെ.ജി. മാരാര് ഭവനില് നിന്നാണ് നിയുക്ത എംഎല്എമാരായ ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര്, വി.മുരളീധരന്, ബി.ബി.ഗോപകുമാര് എന്നിവര് ഒരുമിച്ച് യാത്ര തിരിക്കുക. തുടര്ന്ന് പാളയം രക്തസാക്ഷി മണ്ഡപത്തിലെത്തി പുഷ്പാര്ച്ചന നടത്തിയ ശേഷമായിരിക്കും ഇവര് നിയമസഭയിലേക്ക് പ്രവേശിക്കുക.
നേതാക്കള്ക്കൊപ്പം എന്ഡിഎ മുന്നണിയിലെ പ്രമുഖരും വലിയൊരു ജനസഞ്ചയവും പ്രകടനത്തില് അണിനിരക്കും. മുന് സംസ്ഥാന അധ്യക്ഷന്മാരായ കുമ്മനം രാജശേഖരന്, പി.കെ. കൃഷ്ണദാസ്, കെ.സുരേന്ദ്രന് എന്നിവര്ക്ക് പുറമെ സഖ്യകക്ഷി നേതാക്കളായ ബി.ഗോപകുമാര് (ട്വന്റി ട്വന്റി), പത്മകുമാര് (ബിഡിജെഎസ്) തുടങ്ങിയവരും ഈ റാലിക്ക് മുന്നിരയില് നേതൃത്വം നല്കും. പുതിയ ജനപ്രതിനിധികളുടെ സത്യപ്രതിജ്ഞാ ചടങ്ങ് സംസ്ഥാനവ്യാപകമായി പാര്ട്ടിയുടെ നേതൃത്വത്തില് വലിയ ആഘോഷമായി മാറ്റുമെന്ന് ബിജെപി സംസ്ഥാന ജനറല് സെക്രട്ടറി അഡ്വ.എസ്.സുരേഷ് അറിയിച്ചു.
സത്യപ്രതിജ്ഞയ്ക്ക് മുന്നോടിയായി വിപുലമായ സൗഹൃദ സന്ദര്ശനങ്ങളിലാണ് നിയുക്ത നേമം എംഎല്എ കൂടിയായ രാജീവ് ചന്ദ്രശേഖര്. കേരള നിയമസഭയിലെ ബിജെപിയുടെ ആദ്യ ജനപ്രതിനിധിയായ മുതിര്ന്ന നേതാവ് ഒ. രാജഗോപാലിനെ അദ്ദേഹത്തിന്റെ വസതിയിലെത്തി സന്ദര്ശിച്ച രാജീവ് ചന്ദ്രശേഖര് അനുഗ്രഹം വാങ്ങി. തുടര്ന്ന് എന്എസ്എസ് താലൂക്ക് യൂണിയന് ആസ്ഥാനത്തെത്തിയ അദ്ദേഹം യൂണിയന് ഭാരവാഹികളായ സംഗീത് കുമാര്, കാര്ത്തികേയന് തുടങ്ങിയ പ്രമുഖരുമായും കൂടിക്കാഴ്ച നടത്തി.
നേമം മണ്ഡലത്തില് പാര്ട്ടി നേടിയ ചരിത്രപരമായ വിജയത്തിന് വോട്ടര്മാര്ക്ക് നന്ദി അറിയിക്കുന്നതിനായി വിപുലമായ പരിപാടികളും ബിജെപി ആസൂത്രണം ചെയ്തിട്ടുണ്ട്. ഇതിന്റെ ഭാഗമായി നാളെ വൈകിട്ട് 5 മണി മുതല് മണ്ഡലത്തിലെ എസ്റ്റേറ്റ് വാര്ഡ്, കരുമം വാര്ഡ്, കാലടി വാര്ഡ് എന്നിവിടങ്ങളില് വോട്ടര്മാരെ നേരില് കണ്ട് നന്ദി പ്രകാശിപ്പിക്കുന്ന ‘നന്ദി നേമം’ പരിപാടികള് സംഘടിപ്പിക്കുമെന്നും പാര്ട്ടി വൃത്തങ്ങള് അറിയിച്ചു.
