കോഴിക്കോട്: മുന്കാലങ്ങളിലെ ശബരിമല പ്രക്ഷോഭവുമായി ബന്ധപ്പെട്ട് ഭക്തര്ക്കെതിരെ രജിസ്റ്റര് ചെയ്ത കേസുകള് പൂര്ണ്ണമായും ഒഴിവാക്കണമെന്നും ക്ഷേത്രങ്ങളില് ഉപയോഗിക്കുന്ന പൂജാസാധനങ്ങളുടെ ശുദ്ധി ഉറപ്പുവരുത്താന് കര്ശന നിയമനിര്മ്മാണം നടത്തണമെന്നും കേരള ക്ഷേത്രസംരക്ഷണ സമിതി സര്ക്കാരിനോട് ആവശ്യപ്പെട്ടു. സംഘടനയുടെ 60-ാം വാര്ഷിക സമ്മേളനത്തിന് മുന്നോടിയായി കോഴിക്കോട്ട് ചേര്ന്ന സംസ്ഥാന സമിതി യോഗത്തിലാണ് ഈ ആവശ്യങ്ങളടങ്ങിയ പ്രമേയങ്ങള് പാസാക്കിയത്.
ശബരിമലയിലെ ആചാരസംരക്ഷണത്തിനായി തെരുവിലിറങ്ങിയ ലക്ഷക്കണക്കിന് സ്ത്രീകളടക്കമുള്ള ഭക്തര്ക്കെതിരെ മുന് സര്ക്കാര് ചുമത്തിയ നാലായിരത്തോളം കേസുകള് അടിയന്തരമായി റദ്ദാക്കാന് പുതിയ ഭരണകൂടം തയ്യാറാകണമെന്ന് സമിതി ആവശ്യപ്പെട്ടു. അന്ന് പ്രതിഷേധിച്ചവര്ക്ക് നേരെ അതിക്രമങ്ങള് ഉണ്ടായതായും വ്യാജക്കുറ്റങ്ങള് ചുമത്തപ്പെട്ട പലരും ഇന്നും നിയമനടപടികള് മൂലം ദുരിതത്തിലാണെന്നും പ്രമേയത്തില് പറയുന്നു.
ക്ഷേത്രങ്ങളിലെ പൂജകള്ക്കും ഹോമങ്ങള്ക്കും ഉപയോഗിക്കുന്ന നെയ്യ്, എണ്ണ, കര്പ്പൂരം, ചന്ദനത്തിരി, ശര്ക്കര തുടങ്ങിയ സാധനങ്ങളില് വന്തോതില് മായം കലര്ത്തുന്നതായി സമ്മേളനം ചൂണ്ടിക്കാട്ടി. ഇത് ഭക്തരുടെ ആരോഗ്യത്തെയും ക്ഷേത്രങ്ങളുടെ ആത്മീയ ചൈതന്യത്തെയും ഒരുപോലെ ബാധിക്കുന്ന ഗുരുതരമായ പ്രശ്നമാണ്.
‘കോടിക്കണക്കിന് രൂപയുടെ വ്യാജ പൂജാസാധനങ്ങളാണ് സംസ്ഥാനത്ത് വിറ്റഴിയുന്നത്. ക്ഷേത്രാചാരങ്ങളെ തകര്ക്കാനുള്ള ബോധപൂര്വ്വമായ ശ്രമങ്ങള് ഇതിന് പിന്നിലുണ്ടോ എന്ന് സംശയിക്കേണ്ടിയിരിക്കുന്നു. അതിനാല് ഗുണനിലവാരമുള്ള ദ്രവ്യങ്ങള് ലഭ്യമാക്കാന് ക്ഷേത്രഭാരവാഹികളും സര്ക്കാരും അടിയന്തരമായി ഇടപെടണം.
