ബെംഗളൂരു: ഐ.പി.എല്‍ 2026 സീസണില്‍ റോയല്‍ ചലഞ്ചേഴ്‌സ് ബെംഗളൂരു ടീമില്‍ നിന്ന് താന്‍ വിട്ടുനിന്നത് വ്യക്തിപരമായ കാരണങ്ങളാലല്ല, മറിച്ച് മാനേജ്മെന്റിന്റെ തീരുമാനപ്രകാരമായിരുന്നെന്ന് വെളിപ്പെടുത്തി പേസര്‍ യഷ് ദയാല്‍. ഒരു യൂട്യൂബ് ചാനലിന് നല്‍കിയ പ്രത്യേക അഭിമുഖത്തിലാണ് താരം നിലപാട് വ്യക്തമാക്കിയത്. തന്നെ കളിപ്പിക്കാത്തതിന്റെ കൃത്യമായ കാരണം അറിയില്ലെന്നും, മത്സരങ്ങള്‍ ടി.വിയില്‍ കാണുമ്പോള്‍ വലിയ വിഷമം തോന്നാറുണ്ടെന്നും ദയാല്‍ പറഞ്ഞു.
തന്നെ ടീമില്‍ നിന്ന് പൂര്‍ണ്ണമായി ഒഴിവാക്കിയിട്ടില്ലെന്ന് വിശ്വസിക്കാനാണ് ഇഷ്ടപ്പെടുന്നത്. പകരക്കാരനെ കണ്ടെത്താന്‍ ആര്‍.സി.ബി ശ്രമിക്കാത്തത് തന്നിലുള്ള വിശ്വാസം കൊണ്ടാകാം. ദിനേഷ് കാര്‍ത്തിക് അടക്കമുള്ള മുതിര്‍ന്ന താരങ്ങളുമായും മാനേജ്മെന്റുമായും ഇപ്പോഴും ആശയവിനിമയം നടത്താറുണ്ടെന്നും താരം കൂട്ടിച്ചേര്‍ത്തു. കഴിഞ്ഞ സീസണില്‍ ആര്‍.സി.ബി കന്നി കിരീടം നേടിയപ്പോള്‍ ബൗളിങ് നിരയിലെ പ്രധാന കരുത്തായിരുന്നു യഷ് ദയാല്‍. എന്നാല്‍ ഈ സീസണിന് മുന്‍പ്, വ്യക്തിപരമായ സാഹചര്യങ്ങള്‍ കണക്കിലെടുത്ത് ദയാല്‍ കളിക്കില്ലെന്ന് ആര്‍.സി.ബി ക്രിക്കറ്റ് ഡയറക്ടര്‍ മോ ബോബറ്റ് വാര്‍ത്താസമ്മേളനത്തില്‍ അറിയിച്ചിരുന്നു.
താരത്തിന്റെ കരിയറിന് തിരിച്ചടിയായത് ഉത്തര്‍പ്രദേശിലും രാജസ്ഥാനിലുമായി രജിസ്റ്റര്‍ ചെയ്യപ്പെട്ട കേസുകളാണ്. വിവാഹവാഗ്ദാനം നല്‍കി പീഡിപ്പിച്ചെന്ന പരാതിയില്‍ ഉത്തര്‍പ്രദേശിലെ ഗാസിയാബാദില്‍ രജിസ്റ്റര്‍ ചെയ്ത കേസില്‍ അലഹാബാദ് ഹൈക്കോടതിയില്‍ നിന്ന് ദയാലിന് അറസ്റ്റ് തടഞ്ഞുകൊണ്ടുള്ള ഇടക്കാല ആശ്വാസം ലഭിച്ചിരുന്നു. എന്നാല്‍ രാജസ്ഥാനിലെ ജയ്പൂരില്‍ രജിസ്റ്റര്‍ ചെയ്ത പോക്‌സോ കേസില്‍ ഈ സംരക്ഷണം ലഭിച്ചില്ല.
ജയ്പൂരിലെ സാംഗനീര്‍ സദര്‍ പോലീസ് സ്റ്റേഷനിലാണ് പ്രായപൂര്‍ത്തിയാകാത്ത പെണ്‍കുട്ടിയുടെ പരാതിയില്‍ കേസുള്ളത്. ഐ.പി.എല്‍ മത്സരത്തിനിടയിലാണ് പരിചയപ്പെട്ടതെന്നും ക്രിക്കറ്റ് കരിയറില്‍ സഹായിക്കാമെന്ന് വാഗ്ദാനം നല്‍കി രണ്ടു വര്‍ഷത്തോളം പീഡിപ്പിച്ചെന്നുമാണ് പെണ്‍കുട്ടിയുടെ പരാതി. കടുത്ത നിയമപ്രശ്‌നങ്ങള്‍ കാരണം കഴിഞ്ഞ വര്‍ഷം നടന്ന യു.പി ടി20 ലീഗില്‍ 7 ലക്ഷം രൂപയ്‌ക്ക് ഗോരഖ്പൂര്‍ ലയണ്‍സ് സ്വന്തമാക്കിയിരുന്നെങ്കിലും ദയാലിന് കളിക്കാന്‍ സാധിച്ചിരുന്നില്ല.
