സ്റ്റാവഞ്ചര്: നോര്വേ ചെസ്സ് ടൂര്ണമെന്റിലെ ആദ്യ റൗണ്ടില് ഇന്ത്യന് താരങ്ങളായ ഡി. ഗുകേഷിനും ആര്. പ്രഗ്നാനന്ദയ്ക്കും കഠിനപോരാട്ടത്തിനൊടുവില് വിജയം. എന്നാല്, സ്വന്തം നാട്ടില് കളിക്കാനിറങ്ങിയ ലോക ഒന്നാം നമ്പര് താരം മാഗ്നസ് കാള്സനെ അട്ടിമറി ജയം നേടിയപ്പോള് ഫ്രഞ്ച് താരം അലിറേസ ഫിറൂസ്ജ ആദ്യ ദിനത്തിലെ വലിയ വാര്ത്തയായി.
ജര്മ്മന് താരം വിന്സെന്റ് കെയ്മറുമായി അഞ്ച് മണിക്കൂറോളം നീണ്ടുനിന്ന, 144 നീക്കങ്ങള് പിന്നിട്ട കടുത്ത പോരാട്ടത്തിനൊടുവിലാണ് ഇന്ത്യന് ലോക ചാമ്പ്യന് ഡി. ഗുകേഷ് വിജയം പിടിച്ചെടുത്തത്. ക്ലാസിക്കല് മത്സരം സമനിലയില് അവസാനിച്ചതിനെത്തുടര്ന്നാണ് മത്സരം അര്മ്മഗെദ്ദോന് ടൈ-ബ്രേക്കറിലേക്ക് നീണ്ടത്. ക്ലാസിക്കല് മത്സരത്തിന്റെ അവസാന ഘട്ടങ്ങളില് കെയ്മറുടെ ശക്തമായ സമ്മര്ദ്ദത്തിന് മുന്നില് ഗുകേഷ് പതറിയെങ്കിലും, ടൈ-ബ്രേക്കറില് തകര്പ്പന് തിരിച്ചുവരവ് നടത്തി.
ഗുകേഷിന്റെ 15-ാം നീക്കത്തില് കെയ്മറുടെ പ്രതിരോധം തകര്ത്തു. ഇതോടെ ഗുകേഷ് 1.5 പോയിന്റ് സ്വന്തമാക്കിയപ്പോള് കെയ്മര്ക്ക് ഒരു പോയിന്റ് കൊണ്ട് തൃപ്തിപ്പെടേണ്ടി വന്നു. മറ്റൊരു ഇന്ത്യന് താരമായ ആര്. പ്രഗ്നാനന്ദയും ടൈ-ബ്രേക്കറിലൂടെയാണ് വിജയം ഉറപ്പാക്കിയത്. വെസ്ലി സോയ്ക്കെതിരായ ക്ലാസിക്കല് മത്സരം സമനിലയിലായതിനെ തുടര്ന്ന് നടന്ന പോരാട്ടത്തില് പ്രഗ്നാനന്ദ മൂര്ച്ചയേറിയ ആക്രമണത്തിലൂടെ വിജയം കൈക്കലാക്കി. ഇതോടെ 1.5 പോയിന്റുമായി പ്രഗ്നാനന്ദ ഗുകേഷിനൊപ്പം രണ്ടാം സ്ഥാനത്തെത്തി.
അതേസമയം, ആദ്യ റൗണ്ടിലെ ഏറ്റവും വലിയ അട്ടിമറി മാഗ്നസ് കാള്സന്റെ തോല്വിയായിരുന്നു. അലിറേസ ഫിറൂസ്ജയ്ക്കെതിരായ മത്സരത്തില് ഭൂരിഭാഗം സമയവും കാള്സനായിരുന്നു മേധാവിത്വം. എന്നാല് കടുത്ത സമയക്കുറവ് മൂലം കാള്സന് സംഭവിച്ച വലിയൊരു പിഴവ് ഫിറൂസ്ജ കൃത്യമായി മുതലാക്കുകയായിരുന്നു. റൊമാനിയയില് നടന്ന സൂപ്പര്ബെറ്റ് ചെസ്സ് ക്ലാസിക്കിനിടെ കണങ്കാലിന് പരിക്കേറ്റ ഫിറൂസ്ജ, പ്രത്യേക പ്രൊട്ടക്റ്റീവ് ഷൂ ധരിച്ചാണ് മത്സരത്തിനിറങ്ങിയത്. പരിക്കിന്റെ ബുദ്ധിമുട്ടുകള് മറികടന്ന് മികച്ച പ്രകടനം പുറത്തെടുത്ത ഫ്രഞ്ച് താരം 3 പോയിന്റുമായി പട്ടികയില് ഒന്നാമതെത്തി.
വനിതകളുടെ വിഭാഗത്തില് ഇന്ത്യന് താരം ദിവ്യ ദേശ്മുഖ് തിളങ്ങിയപ്പോള്, സീനിയര് താരം കൊനേരു ഹംപിക്ക് തോല്വിയോടെ തുടരേണ്ടി വന്നു. കസാക്കിസ്ഥാന് താരം ബിബിസാര അസ്സൗബയേവയോടാണ് ഹംപി പരാജയപ്പെട്ടത്. ഇതോടെ ബിബിസാര വനിതാ വിഭാഗത്തില് ഒന്നാമതെത്തി. നിലവിലെ വനിതാ ലോക ചാമ്പ്യന് ജു വെന്ജുനെതിരെയുള്ള ക്ലാസിക്കല് മത്സരം സമനിലയിലാക്കിയ ദിവ്യ ദേശ്മുഖ്, പിന്നീട് നടന്ന ടൈ-ബ്രേക്കറില് തകര്പ്പന് വിജയം നേടി. മറ്റൊരു മത്സരത്തില് നിലവിലെ ചാമ്പ്യന് അന്ന മുസിചുക്കിനെ ടൈ-ബ്രേക്കറില് പരാജയപ്പെടുത്തി ഷു ജിനറും വിജയം കണ്ടു.
ആദ്യ റൗണ്ട് മത്സരങ്ങള് അവസാനിച്ചപ്പോള് ഓപ്പണ് വിഭാഗത്തില് അലിറേസ ഫിറൂസ്ജയും, വനിതാ വിഭാഗത്തില് ബിബിസാര അസ്സൗബയേവയും 3 പോയിന്റുമായി മുന്നിലാണ്. ഓപ്പണ് വിഭാഗത്തില് ഗുകേഷും പ്രഗ്നാനന്ദയും, വനിതാ വിഭാഗത്തില് ദിവ്യയും ഷു ജിനറും രണ്ടാം സ്ഥാനത്തുണ്ട്.
