തിരുവനന്തപുരം: സിഎംആർഎൽ എക്സാലോജിക്സ് മാസപ്പടി കേസിൽ മുൻ മുഖ്യമന്ത്രിയും പ്രതിപക്ഷ നേതാവുമായ പിണറായി വിജയന്റെയും അദ്ദേഹത്തിന്റെ മകൾ വീണ വിജയന്റെയും വസതികൾ ഉൾപ്പെടെ 12 കേന്ദ്രങ്ങളിൽ എൻഫോഴ്സ്മെന്റ് ഡയറക്ടറേറ്റ് (ഇ.ഡി) കനത്ത സുരക്ഷയിൽ മിന്നൽ പരിശോധന നടത്തി. റെയ്ഡിൽ വീണ വിജയനുമായി ബന്ധപ്പെട്ട നിർണായക ബാങ്ക് രേഖകൾ പിടിച്ചെടുത്ത ഇ.ഡി, അവരുടെ മൊബൈൽ ഫോണുകളും കസ്റ്റഡിയിലെടുത്തു. കേസിൽ ഇ.ഡി അന്വേഷണം തുടരാമെന്ന ഹൈക്കോടതി ഉത്തരവ് പുറത്തുവന്നതിന് തൊട്ടുപിന്നാലെയാണ്, കണ്ണൂരിലെ പിണറായി വിജയന്റെ സ്വന്തം വീട്ടിലും തിരുവനന്തപുരം ബേക്കറി ജംക്ഷനിലെ വാടക വസതിയിലും പുലർച്ചെയോടെ ഇ.ഡി ഉദ്യോഗസ്ഥർ പരിശോധന ആരംഭിച്ചത്.
സേവനങ്ങളൊന്നും നൽകാതെ വീണ വിജയന്റെ ഉടമസ്ഥതയിലുള്ള എക്സാലോജിക്സ് സൊല്യൂഷൻസ് എന്ന കമ്പനിക്ക് സിഎംആർഎൽ വഴി കോടികൾ മാസപ്പടിയായി നൽകിയെന്ന കേസിലാണ് ഇ.ഡിയുടെ ഈ വിപുലമായ അന്വേഷണം നടന്നത്. റെയ്ഡിന് പിന്നാലെ കേസുമായി ബന്ധപ്പെട്ട സാമ്പത്തിക ഇടപാടുകളുടെ വേരുകൾ കണ്ടെത്താൻ പ്രതികളുമായി ബന്ധപ്പെട്ട പ്രധാന ബാങ്ക് അക്കൗണ്ടുകളും ലോക്കർ സംവിധാനങ്ങളും ഇ.ഡി അടിയന്തരമായി മരവിപ്പിച്ചു.
ഡിജിറ്റൽ തെളിവുകൾ ശേഖരിക്കുന്നതിന്റെ ഭാഗമായാണ് മൊബൈൽ ഫോണുകൾ ഇ.ഡി കസ്റ്റഡിയിലെടുത്തിരിക്കുന്നത്. വരും ദിവസങ്ങളിൽ ഈ ഫോണുകളിൽ നിന്നുള്ള ഡിജിറ്റൽ വിവരങ്ങളും പിടിച്ചെടുത്ത ബാങ്ക് രേഖകളും വിശദമായി പരിശോധിക്കുന്നതിലൂടെ കേസിൽ അതീവ നിർണായകമായ വഴിത്തിരിവുകൾ ഉണ്ടാകുമെന്നാണ് വിലയിരുത്തുന്നത്.
