കോഴിക്കോട്: ആഷിഖ് അബുവും മനു ആന്റണിയും ചേര്ന്ന് സംവിധാനം ചെയ്യുന്ന ‘അജസുന്ദരി’ എന്ന സിനിമയുടെ അണിയറപ്രവര്ത്തകര്ക്കെതിരെ ഗുരുതര വഞ്ചനാക്കുറ്റവുമായി കോഴിക്കോട് വിലങ്ങാട്ടെ വ്യാപാരികള് രംഗത്ത്. ജോജു ജോര്ജ്, ലിജോമോള് ജോസ് എന്നിവര് കേന്ദ്രകഥാപാത്രങ്ങളാകുന്ന ചിത്രത്തിന്റെ ഷൂട്ടിംഗിനായി മാസങ്ങളോളം വാങ്ങിയ സാധനങ്ങളുടെ ലക്ഷക്കണക്കിന് രൂപയുടെ കുടിശ്ശിക നല്കാതെ സിനിമാസംഘം സ്ഥലംവിട്ടെന്നാണ് പരാതി. ഷൂട്ടിംഗ് കഴിഞ്ഞ് മൂന്ന് മാസം പിന്നിട്ടിട്ടും പണം ലഭിക്കാത്തതിനെ തുടര്ന്ന് വ്യാപാരി വ്യവസായി ഏകോപന സമിതിയുടെയും നാട്ടുകാരുടെയും നേതൃത്വത്തില് ഇന്ന് പോലീസില് പരാതി നല്കാന് ഒരുങ്ങുകയാണ് വ്യാപാരികള്.
ഉരുള്പൊട്ടല് ദുരന്തം വിതച്ച വിലങ്ങാട് പ്രദേശത്ത് കഴിഞ്ഞ ഒക്ടോബറിലാണ് സിനിമയുടെ ചിത്രീകരണം തുടങ്ങിയത്. മൂന്ന് മാസത്തെ ഷൂട്ടിംഗിനിടെ തുടക്കത്തില് കൃത്യമായി പണം നല്കി വിശ്വാസം നേടിയ ശേഷമാണ് പ്രൊഡക്ഷന് സംഘം ലക്ഷങ്ങളുടെ സാധനങ്ങള് കടമായി വാങ്ങിയത്. സിനിമ കഴിഞ്ഞ ഉടന് പണം നല്കാമെന്ന് പ്രൊഡക്ഷന് കണ്ട്രോളര് ബിജു കടവൂര് അടക്കമുള്ളവര് ഉറപ്പുനല്കിയിരുന്നെങ്കിലും പിന്നീട് ബന്ധപ്പെട്ടപ്പോള് ഇവര് ഒഴിഞ്ഞുമാറുകയായിരുന്നു. ഉരുള്പൊട്ടലില് എല്ലാം നഷ്ടപ്പെട്ട് കടം വാങ്ങിയും ലോണെടുത്തും ജീവിതം തിരികെപ്പിടിക്കാന് ശ്രമിക്കുന്ന പാവപ്പെട്ട വ്യാപാരികളാണ് ഈ വഞ്ചനയ്ക്ക് ഇരയായത്.
പച്ചക്കറി വ്യാപാരിയായ പി.എസ് മനോജ് ഉരുള്പൊട്ടലില് കട തകര്ന്ന ഇദ്ദേഹം മലബാര് കാന്സര് സെന്ററില് ചികിത്സയിലാണ്. കുടുംബശ്രീ ലോണെടുത്ത് തുടങ്ങിയ കടയില് നിന്ന് മെസ്സ് കരാറുകാരിയായ സാജിദ് വഴി വാങ്ങിയ വകയില് 54,000 രൂപയാണ് കിട്ടാനുള്ളത്. ഇറച്ചിക്കട ഉടമയായ ബെന്നി ജോസഫ് കിഡ്നി മാറ്റിവെക്കല് ശസ്ത്രക്രിയ കഴിഞ്ഞ ഇദ്ദേഹത്തിന് കോഴി, ബീഫ്, മുട്ട ഇനങ്ങളിലായി ഒരു ലക്ഷം രൂപ ലഭിക്കാനുണ്ട്. മില്മ ബൂത്ത് നടത്തുന്ന അപ്പച്ചന് പാല്, കൊമേഴ്സ്യല് ഗ്യാസ് സിലിണ്ടറുകള് എന്നിവ നല്കിയ ഇനത്തില് 46,000 രൂപ കുടിശ്ശികയുണ്ട്.
മലഞ്ചരക്ക് വ്യാപാരി തോമസിന് തേങ്ങ നല്കിയ വകയില് 18,000 രൂപ കിട്ടാനുണ്ട്. പണം കിട്ടാതായതോടെ ഇവിടുത്തെ പല ചെറുകിട കടകളും പൂട്ടിയിടേണ്ട അവസ്ഥയിലാണ്. പണം ലഭിച്ചില്ലെങ്കില് ശക്തമായ നിയമനടപടികളുമായി മുന്നോട്ടുപോകാനാണ് വ്യാപാരികളുടെ തീരുമാനം.
