അഹമ്മദാബാദ്: ഐപിഎല്‍ ഫൈനല്‍ മത്സരത്തിനിടെ പെരുമാറ്റച്ചട്ടം ലംഘിച്ച റോയല്‍ ചലഞ്ചേഴ്‌സ് ബെംഗളൂരു ബാറ്റര്‍ ടിം ഡേവിഡിന് കനത്ത തിരിച്ചടി. താരത്തിന് മാച്ച് ഫീയുടെ 50 ശതമാനം പിഴ ചുമത്തുകയും ഒരു മത്സരത്തില്‍ നിന്ന് വിലക്കുകയും ചെയ്തു. നരേന്ദ്ര മോദി സ്റ്റേഡിയത്തില്‍ ഞായറാഴ്ച നടന്ന ഫൈനലില്‍ ഗുജറാത്ത് ടൈറ്റന്‍സിനെ അഞ്ച് വിക്കറ്റിന് തോല്‍പ്പിച്ച് ആര്‍സിബി കിരീടം നിലനിര്‍ത്തിയിരുന്നു.
ഫൈനലില്‍ 17 പന്തില്‍ 24 റണ്‍സ് നേടിയ ഡേവിഡ്, ഐപിഎല്‍ പെരുമാറ്റച്ചട്ടത്തിലെ ആര്‍ട്ടിക്കിള്‍ 2.9 ലംഘിച്ചതായി കണ്ടെത്തുകയായിരുന്നു. മത്സരത്തിനിടെ കളിക്കാര്‍, അമ്പയര്‍മാര്‍, മാച്ച് റഫറിമാര്‍ അല്ലെങ്കില്‍ മറ്റ് വ്യക്തികള്‍ക്ക് നേരെ അനുചിതമായോ അപകടകരമായ രീതിയിലോ പന്തോ ക്രിക്കറ്റ് ഉപകരണങ്ങളോ (വാട്ടര്‍ ബോട്ടില്‍ ഉള്‍പ്പെടെയുള്ളവ) എറിയുന്നത് തടയുന്നതാണ് ഈ നിയമം.
ഗുജറാത്ത് ടൈറ്റന്‍സ് ഇന്നിംഗ്‌സിന്റെ പത്താം ഓവറിലായിരുന്നു സംഭവം. വിക്കറ്റ് വീണതിന് പിന്നാലെ ഫീല്‍ഡ് അമ്പയര്‍ നിതിന്‍ മേനോന് നേരെ ടിം ഡേവിഡ് ഐസ് ബാഗ് എറിയുകയായിരുന്നു. താരം കുറ്റം സമ്മതിക്കുകയും ശിക്ഷ അംഗീകരിക്കുകയും ചെയ്തതിനെ തുടര്‍ന്ന് മാച്ച് റഫറി ജവഗല്‍ ശ്രീനാഥ് പിഴയും വിലക്കും പ്രഖ്യാപിച്ചു.
ഈ സീസണില്‍ ഡേവിഡ് നടത്തുന്ന മൂന്നാമത്തെ ‘ലെവല്‍ 1’ അച്ചടക്കലംഘനമാണിത്. നേരത്തെ 20-ാം മത്സരത്തില്‍ ഒരു ഡീമെറിറ്റ് പോയിന്റും, 54-ാം മത്സരത്തില്‍ രണ്ട് ഡീമെറിറ്റ് പോയിന്റും താരത്തിന് ലഭിച്ചിരുന്നു. പുതിയ ലംഘനത്തോടെ രണ്ട് ഡീമെറിറ്റ് പോയിന്റുകള്‍ കൂടി ലഭിച്ചതോടെ ആകെ പോയിന്റ് അഞ്ചായി. ഐപിഎല്‍ നിയമപ്രകാരം അഞ്ച് ഡീമെറിറ്റ് പോയിന്റുകള്‍ തികയുന്ന കളിക്കാരന് ഒരു മത്സരത്തില്‍ നിന്ന് വിലക്ക് നേരിടേണ്ടി വരും. ഇതോടെ, അടുത്ത സീസണില്‍ ആര്‍സിബിക്ക് വേണ്ടിയോ മറ്റേതെങ്കിലും ഫ്രാഞ്ചൈസിക്ക് വേണ്ടിയോ കളിച്ചാലും ആദ്യ മത്സരം ടിം ഡേവിഡിന് നഷ്ടമാകും. ഈ സീസണില്‍ 16 മത്സരങ്ങളില്‍ നിന്ന് 305 റണ്‍സാണ് താരം നേടിയത്.
