അറ്റ്‌ലാന്റ: ലോകകപ്പില്‍ ഈജിപ്തിനെ തോല്‍പ്പിച്ച് അര്‍ജന്റീന ക്വാര്‍ട്ടര്‍ ഫൈനലിലെത്തിയ മത്സരത്തില്‍ സൂപ്പര്‍ താരം ലയണല്‍ മെസി ചരിത്രപുസ്തകത്തില്‍ വീണ്ടും സ്വന്തം പേര് കുറിച്ചു. ഒരു ഗോളും ഒരു അസിസ്റ്റുമായി ടീമിന്റെ വിജയത്തില്‍ നിര്‍ണായക പങ്കുവഹിച്ച മെസി ലോകകപ്പ് ചരിത്രത്തിലെ നിരവധി റെക്കോര്‍ഡുകള്‍ സ്വന്തം പേരിലാക്കി.
ഈജിപ്തിനെതിരായ ഗോളോടെ ലോകകപ്പില്‍ മെസിയുടെ ആകെ ഗോള്‍ നേട്ടം 21 ആയി. ഇതോടെ ലോകകപ്പ് ചരിത്രത്തില്‍ 21 ഗോളുകള്‍ നേടുന്ന ആദ്യ ഫുട്‌ബോള്‍ താരമെന്ന അപൂര്‍വ നേട്ടവും മെസി സ്വന്തമാക്കി. കൂടാതെ, തുടര്‍ച്ചയായ ഒന്‍പതാം ലോകകപ്പ് മത്സരത്തില്‍ ഗോള്‍ നേടുന്ന ആദ്യ താരമെന്ന റെക്കോര്‍ഡും മെസിയുടെ പേരിലായി.
മത്സരത്തില്‍ ക്രിസ്റ്റ്യന്‍ റൊമേറോ നേടിയ ആദ്യ ഗോളിന് വഴിയൊരുക്കിയതും മെസിയായിരുന്നു. ഇതോടെ ലോകകപ്പില്‍ മെസിയുടെ അസിസ്റ്റുകളുടെ എണ്ണം ഒന്‍പതായി ഉയര്‍ന്നു. അര്‍ജന്റീനയുടെ ഇതിഹാസ താരം ഡീഗോ മറഡോണയുടെ എട്ട് അസിസ്റ്റ് എന്ന റെക്കോര്‍ഡും ഇതോടെ മെസി മറികടന്നു.
എന്നാല്‍, മത്സരത്തില്‍ ഒരു നാണക്കേടിന്റെ റെക്കോര്‍ഡും മെസിയുടെ പേരിലായി. 15-ാം മിനിറ്റില്‍ ലഭിച്ച പെനാല്‍റ്റി ലക്ഷ്യത്തിലെത്തിക്കാന്‍ മെസിക്കായില്ല. ലോകകപ്പ് ചരിത്രത്തില്‍ മെസി പാഴാക്കിയ നാലാമത്തെ പെനാല്‍റ്റിയാണിത്, ഇതോടെ ലോകകപ്പില്‍ ഏറ്റവും കൂടുതല്‍ പെനാല്‍റ്റി നഷ്ടപ്പെടുത്തിയ താരമെന്ന റെക്കോര്‍ഡും അദ്ദേഹത്തിനായി.
ഇതോടൊപ്പം, ഒരു ലോകകപ്പില്‍ രണ്ട് പെനാല്‍റ്റികള്‍ നഷ്ടപ്പെടുത്തുന്ന ആദ്യ താരമെന്ന റെക്കോര്‍ഡും മെസി സ്വന്തമാക്കി. 2018ല്‍ ഐസ്ലന്‍ഡിനെതിരെയും, 2022ല്‍ പോളണ്ടിനെതിരെയും, 2026 ലോകകപ്പില്‍ ഓസ്ട്രിയയ്‌ക്കും ഈജിപ്തിനുമെതിരെയും പെനാല്‍റ്റി പാഴാക്കിയതോടെ, തുടര്‍ച്ചയായ മൂന്ന് ലോകകപ്പുകളില്‍ പെനാല്‍റ്റി നഷ്ടപ്പെടുത്തുന്ന ആദ്യ താരമായും മെസി മാറി.
കരിയറില്‍ ആകെ 34-ാം തവണയും, അര്‍ജന്റീനയ്‌ക്കായി എട്ടാം തവണയും മെസി പെനാല്‍റ്റി നഷ്ടപ്പെടുത്തുകയായിരുന്നു. അതേസമയം, ലോകകപ്പില്‍ ഇതുവരെ ഏഴ് ഗോളുകളുമായി ഗോള്‍ഡന്‍ ബൂട്ടിനായുള്ള പോരാട്ടത്തില്‍ മെസിയും ഫ്രാന്‍സിന്റെ കിലിയന്‍ എംബാപ്പെയും തമ്മില്‍ ശക്തമായ മത്സരമാണ് തുടരുന്നത്.
