കണ്ണൂർ: തേങ്ങയിടുന്നതിനിടെ കടന്നൽക്കുത്തേറ്റ യുവാവ് ചികിത്സയിലിരിക്കെ മരിച്ചു. പരിയാരം തലോറ സ്വദേശി ടിവി ഗോകുൽദാസ് ആണ് കണ്ണൂരിലെ സ്വകാര്യ ആശുപത്രിയിൽ ചികിത്സയിലിരിക്കെ ഇന്ന് രാവിലെ മരിച്ചത്.
ഓഗസ്റ്റ് 28ന് രാവിലെ 11 മണിയോടെയാണ് സംഭവം. തളിപ്പറമ്പ് അടിക്കുംപാറയിലെ സ്വകാര്യ വ്യക്തിയുടെ വീട്ടിൽ തേങ്ങ പറിക്കുന്നതിനിടെയാണ് കടന്നൽക്കൂട് ഇളകിയത്. തുടർന്ന് കൂട്ടത്തോടെ എത്തിയ കടന്നലുകൾ ഗോകുൽദാസിനെ ആക്രമിക്കുകയായിരുന്നു.
കടന്നലുകളുടെ ആക്രമണത്തിൽ നിന്ന് രക്ഷപ്പെടാൻ ഗോകുൽദാസ് സമീപത്തെ വീട്ടിലേക്ക് ഓടിക്കയറിയെങ്കിലും കടന്നലുകൾ പിന്നാലെയെത്തി വീണ്ടും ആക്രമിച്ചു. ഗുരുതരമായി പരിക്കേറ്റതിനെ തുടർന്ന് ആശുപത്രിയിൽ പ്രവേശിപ്പിക്കുകയായിരുന്നു.
ചികിത്സയിൽ കഴിയുന്നതിനിടെയാണ് ഇന്ന് രാവിലെ മരണം സംഭവിച്ചത്. മൃതദേഹം പോസ്റ്റ്മോർട്ടം ഉൾപ്പെടെയുള്ള നടപടികൾക്ക് ശേഷം ബന്ധുക്കൾക്ക് വിട്ടുനൽകും.
