തിരുവനന്തപുരം: കാന്തപുരം എ.പി. അബൂബക്കർ മുസ്‌ല്യാരുടെ സ്ത്രീ വിരുദ്ധ പരാമർശത്തിൽ പ്രമുഖ നടിമാരും സാമൂഹിക പ്രവർത്തകരും പുലർത്തുന്ന ‘സെലക്ടീവ്’ മൗനത്തെ പരിഹസിച്ച് ബിജെപി നേതാവ് യുവരാജ് ഗോകുൽ.
‘കേരളത്തിൽ കുറേ പെൺപുലികളുണ്ട്…’ എന്ന് തുടങ്ങുന്ന ഫേസ്ബുക്ക് പോസ്റ്റിൽ പാർവതി തിരുവോത്ത്, നിമിഷ സജയൻ, റിമ കല്ലിങ്കൽ, രഞ്ജിനി ഹരിദാസ്, മാലാ പാർവതി, ഭാഗ്യലക്ഷ്മി തുടങ്ങിയവരുടെ പേരെടുത്തുപറഞ്ഞാണ് പരിഹാസം. ഇവരാരും കാന്തപുരത്തിന്റെ പേര് പോലും ഇവർ കേട്ടിട്ടില്ലെന്നും അദ്ദേഹം പറഞ്ഞത് എന്താണെന്ന് അറിഞ്ഞിട്ടില്ലെന്നും യുവരാജ് ഗോകുൽ പറഞ്ഞു.
സാധാരണയായി ഇൻസ്റ്റഗ്രാം സ്റ്റോറിയിലൂടെയും പ്രസ്താവനകളിലൂടെയും മെഴുകുതിരി പ്രതിഷേധങ്ങളിലൂടെയും റോഡ് സൈഡ് പ്രതിഷേധങ്ങളിലൂടെയും സജീവമായി പ്രതികരിക്കുന്നവർ കാന്തപുരത്തിന്റെ പരാമർശത്തിൽ മൗനം പാലിക്കുകയാണെന്നും യുവരാജ് ഗോകുൽ വിമർശിച്ചു. ‘ഇൻസ്റ്റയിൽ സ്റ്റോറിയില്ല… മെഴുകുതിരിയല്ല… പ്രസ്താവനകളില്ല… റോഡ് സൈഡ് ഷോ ഓഫില്ല… ജീവനോടെ ഉണ്ടായിരിക്കുമല്ലേ?’ എന്നായിരുന്നു അദ്ദേഹത്തിന്റെ വാക്കുകൾ.
സ്ത്രീകൾ പൊതുരംഗത്തേക്ക് ഇറങ്ങുന്നതിനെതിരായ കാന്തപുരത്തിന്റെ പരാമർശം വലിയ രാഷ്‌ട്രീയ-സാമൂഹിക ചർച്ചയായിരിക്കെയാണ് യുവരാജ് ഗോകുലിന്റെ ഫേസ്ബുക്ക് പോസ്റ്റും ശ്രദ്ധ നേടുന്നത്.
