ന്യൂഡല്ഹി: കാര്ഗില് മേഖലയില് വീണ്ടും ഭൂചലനം. ഇന്നുണ്ടായിരിക്കുന്നത് 4.4 തീവ്രതയോട് കൂടിയ ചലനമാണ്. അതിരാവിലെ 5.47നാണ് ചലനം അനുഭവപ്പെട്ടിരിക്കുന്നത്. വടക്ക് പടിഞ്ഞാറന് മേഖലയിലാണ് ഭൂചലനമുണ്ടായത്. കഴിഞ്ഞ മൂന്ന് മാസത്തിനിടെ ഇതോടെ 12ലേറെ ഭൂചലനങ്ങളാണ് ഹിമാലയന് മലനിരകളില് അനുഭവപ്പെട്ടിരിക്കുന്നത്.
അരുണാചല് പ്രദേശ്, മേഘാലയ, മിസോറം, ഉത്തരാഞ്ചല് പ്രദേശങ്ങളിലായി ഭൂചലനങ്ങള് പരക്കെ അനുഭവപ്പെട്ടിരുന്നു. വടക്ക് കിഴക്കന് മേഖലയിലും ഹിമാലയന് സംസ്ഥാനങ്ങളിലും ഭൂചലനം കഴിഞ്ഞ രണ്ടു മാസമായി അനുഭവപ്പെടുന്നു എന്നതാണ് ആശങ്കയുണ്ടാക്കുന്നത്. പത്തിലേറ ചലനങ്ങളാണ് സംസ്ഥാനങ്ങളില് ഉണ്ടായത്. ജമ്മുകശ്മീരില് ആഗസ്റ്റ്
അവസാനയാഴ്ചയാണ് ഭൂചലനം ഉണ്ടായത്. റിക്ടര് സ്കെയിലില് 4.1 രേഖപ്പെടുത്തിയ ചലനം ഹനാലേ മേഖലയിലാണ് അനുഭവപ്പെട്ടത്.
മണിപ്പൂരിലെ ചണ്ഡേല് ജില്ലയില് തീവ്രത 4.0 രേഖപ്പെടുത്തിയ ഭൂചലനമാണ് ഉണ്ടായത്. ആളപായം രേഖപ്പെടുത്തിയിരുന്നില്ല. മിസോറമില് ജൂലൈ മാസത്തില് നാലുതവണയാണ് ഭൂചലനം ഉണ്ടായത്. 4.3 തീവ്രത രേഖപ്പെടുത്തിയ ഭൂചലനമാണ് കൂടുതല് ശക്തിയായി അനുഭവപ്പെട്ടത്. ചമ്പായ് ജില്ലയടക്കം ഒരാഴ്ചയ്ക്കിടെ 8 ഭൂചലനങ്ങളാണ് ഹിമാലയന് സംസ്ഥാനത്ത് ഉണ്ടായത്.
