മുംബൈ: ഐ.പി.എല് മത്സരങ്ങളുടെ ഒരുക്കങ്ങള് വിലയിരുത്താനായി ബി.സി.സി.ഐ അദ്ധ്യക്ഷന് സൗരവ് ഗാംഗുലി ഇന്ന് ദുബായിയിലെത്തും. ചാര്ട്ടര് ചെയ്ത പ്രത്യേക വിമാനത്തിലെത്തുന്ന ഗാംഗുലി ഇന്സ്റ്റാഗ്രാമിലൂടെയാണ് ചിത്രങ്ങള് പുറത്തുവിട്ടത്.
‘ആറു മാസങ്ങള്ക്ക് ശേഷം ആദ്യമായി ദുബായിയിലേക്കുള്ള വിമാനയാത്ര. ശരിക്കും ആവേശം തോന്നുന്ന നിമിഷമാണിത്.’ ഇന്ത്യന് ക്രിക്കറ്റിന് പുതുജീവന് പകരാന് പോകുന്ന ഐ.പി.എല്ലിനായി പോകുന്ന ഗാംഗുലി പറഞ്ഞു.
സെപ്തംബര് 19ന് ആരംഭിക്കാനിരിക്കുന്ന ഐ.പി.എല് 2020 സീസണ് ദുബായ്, അബുദാബി, ഷാര്ജ എന്നിവിടങ്ങിലായിട്ടാണ് നടക്കുന്നത്. ഉദ്ഘാടനമത്സരം അബുദാബിയിലാണ് തീരുമാനിച്ചിട്ടുള്ളത്. നിലവിലെ ചാമ്പ്യന്മാരായ മുംബൈ ഇന്ത്യന്സും കഴിഞ്ഞതവണത്തെ റണ്ണേഴ്സപ്പായ ചെന്നൈ സൂപ്പര്കിംഗ്സുമാണ് ആദ്യ മത്സരത്തില് ഏറ്റുമുട്ടുന്നത്.
പുതിയ സ്പോണ്സര്മാരും മറ്റ് അടിസ്ഥാന സൗകര്യങ്ങളുമെല്ലാം യുദ്ധകാലാടിസ്ഥാനത്തിലാണ് ബി.സി.സിഐ തയ്യാറാക്കിയത്. കേന്ദ്രസര്ക്കാറിന്റെ അനുമതി ജൂലൈ മാസത്തില് ലഭിച്ചതോടെയാണ് യു.എ.ഇ പുതിയ സീസണിനുള്ള വേദിയാക്കി മാറ്റിയത്. ഇന്ത്യയില് നടക്കാത്തതിനാലും കാണികളുടെ കുറവുണ്ടാകു മെന്നതിനാലും 4000 കോടി രൂപയുടെ വരുമാന ഇടിവാണ് കണക്കാക്കുന്നത്.
Comments