പൂനെ: റോയൽ എൻഫീൽഡ് സ്വന്തമാക്കുകയെന്നത് നമ്മളിൽ പലരുടെയും സ്വപ്നമാണ്. പക്ഷെ ജീവിത സാഹചര്യങ്ങളാൽ എല്ലാവർക്കും അതിന് കഴിയണമെന്നില്ല. റോയൽ എൻഫീൽഡ് സ്വന്തമാക്കാനായി ഒരു അടിപൊളി മാർഗം ആവിഷ്ക്കരിച്ചിരിക്കുകയാണ് പൂനെയിലെ ഒരു ഹോട്ടൽ. സംഭവം എന്താണെന്നല്ലേ. വയറു നിറയെ ഭക്ഷണം കഴിച്ചാൽ ഒരു റോയൽ എൻഫീൽഡ് ബുള്ളറ്റ് സ്വന്തമാക്കാം.
പൂനെയിലെ ശിവരാജ് ഹോട്ടലാണ് ഇത്തരമൊരു മത്സരം പ്രഖ്യാപിച്ചിരിക്കുന്നത്. ഇവരുടെ ഹോട്ടലിലെ ഒരു വലിയ ‘നോൺ വെജ് മീൽസ് താലി’കഴിച്ചു തീർക്കുന്നവർക്ക് 1.65 ലക്ഷം രൂപ വില വരുന്ന റോയൽ എൻഫീൽഡ് ബുള്ളറ്റ് സൗജന്യമായി നൽകുമെന്നാണ് വാഗ്ദാനം. മീൽസ് താലി എന്നു കേൾക്കുമ്പോൾ നിസാരം എന്ന് തോന്നുമെങ്കിലും നാല് കിലോയോളം വരും ഇതിലെ ഭക്ഷണം. ഇത് ഒരു മണിക്കൂർ കൊണ്ട് കഴിച്ചു തീർക്കുന്നവരാണ് വിജയികൾ.
മട്ടൻ, മീൻ തുടങ്ങി പന്ത്രണ്ടോളം നോൺ വെജ് വിഭവങ്ങൾ അടങ്ങിയ നാല് കിലോ ഭാരം വരുന്ന താലിയാണ് മത്സരത്തിനായി പ്രത്യേകം തയ്യാറാക്കിയിരിക്കുന്നത്. 55 ൽ അധികം ആളുകൾ ചേർന്നാണ് ഈ ഭക്ഷണ വിഭവം തയ്യാറാക്കിയതെന്നാണ് ഹോട്ടൽ ഉടമയായ അതുൽ വൈകർ പറയുന്നത്.
വിവിധ തരം പൊരിച്ച മീനുകൾ, ചിക്കൻ തന്തൂരി, ഡ്രൈ മട്ടൺ, ഗ്രേ മട്ടൺ, ചിക്കൻ മസാല, കൊഞ്ച് ബിരിയാണി എന്നിവയും താലി മീൽസിലെ വിഭവങ്ങളാണ് ഏകദേശം 2500 രൂപയാണ് ഈ താലി മീൽസിന്റെ വില. അൻപത്തിയഞ്ച് ആളുകൾ ചേർന്നാണ് ഈ പ്രത്യേക താലി തയ്യാറാക്കുന്നതെന്നും ഉടമ പറയുന്നു.
കൊറോണയെ തുടർന്ന് പ്രതിസന്ധിയിലായ ഹോട്ടൽ മേഖലകളെല്ലാം തിരിച്ചു വരവിന്റെ പാതയിലാണ്. ഈ സമയത്ത് കൂടുതൽ ആളുകളെ തന്റെ ഹോട്ടലിലേക്ക് ആകർഷിക്കാനാണ് ഇത്തരമൊരു ആശയത്തിന് രൂപം നൽകിയതെന്നാണ് അതുൽ പറയുന്നത്.
ബുള്ളറ്റ് താലി മീൽസിന് മികച്ച പ്രതികരണമാണ് ലഭിക്കുന്നത്. ധാരാളം ആളുകൾ മത്സരത്തിൽ പങ്കെടുക്കാനായെത്തുന്നത്. തിരക്ക് കൂടുന്നെങ്കിലും സാമൂഹിക അകലം ഉൾപ്പെടെ കൊറോണ മാനദണ്ഡങ്ങൾ ലംഘിക്കപ്പെടുന്നില്ലെന്ന് റസ്റ്റോറന്റ് ജീവനക്കാർ ഉറപ്പാക്കുന്നുണ്ട്. ദിവസേന 65 താലി വരെ വിറ്റു പോകുന്നുണ്ടെന്നാണ് ജീവനക്കാർ പറയുന്നത്.
അഞ്ചു ബുള്ളറ്റുകളാണ് മത്സരത്തിൽ വിജയിക്കുന്നവർക്ക് സമ്മാനമായി നൽകാൻ വേണ്ടി ഒരുക്കിയിരിക്കുന്നത്. സോലാപുർ സ്വദേശിയായ സോമന്ത് പവർ എന്ന യുവാവ് ഒരു മണിക്കൂറിനുള്ളിൽ താലി പാത്രം കാലിയാക്കി സമ്മാനം നേടിയെന്നും ഹോട്ടൽ ഉടമ അതുൽ വൈകർ അറിയിച്ചു.
