ലക്നൗ : ഇംഗ്ളണ്ടിനെ ഇന്ത്യൻ പുരുഷ ടീം പരാജയപ്പെടുത്തിയതിനു പിന്നാലെ ക്രിക്കറ്റിൽ നിന്ന് തന്നെ മറ്റൊരു വിജയ വാർത്ത. ലക്നൗവിൽ നടന്ന ഇന്ത്യ – ദക്ഷിണാഫ്രിക്ക വനിത ടി ട്വെന്റി മത്സരത്തിൽ ഇന്ത്യയ്‌ക്ക് തകർപ്പൻ ജയം. ദക്ഷിണാഫ്രിക്കയെ 9 വിക്കറ്റിനാണ് ഇന്ത്യൻ വനിത ടീം തറപറ്റിച്ചത്.
ആദ്യം ബാറ്റ് ചെയ്ത ദക്ഷിണാഫ്രിക്ക ഇന്ത്യൻ ബൗളിംഗിനു മുന്നിൽ തകർന്നടിയുകയായിരുന്നു. രാജേശ്വരി ഗെയ്‌ക്‌വാദിന്റെ കുത്തിത്തിരിഞ്ഞ പന്തുകൾക്ക് മറുപടി നൽകാനാകാതെ ദക്ഷിണാഫ്രിക്ക വിഷമിച്ചു. നാല് ഓവറിൽ 9 റൺസിന് മൂന്ന് വിക്കറ്റുകൾ വീഴ്‌ത്തിയ രാജേശ്വരി ദക്ഷിണാഫ്രിക്കയുടെ മുൻ നിരയെ തകർത്തു. 20 ഓവറിൽ 7 വിക്കറ്റുകളുടെ നഷ്ടത്തിൽ 112 റൺസെടുക്കാനേ ദക്ഷിണാഫ്രിക്കയ്‌ക്ക് കഴിഞ്ഞുള്ളൂ.
113 റൺസ് വിജയ ലക്ഷ്യവുമായിറങ്ങിയ ഇന്ത്യയ്‌ക്ക് വേണ്ടി ഓപ്പണർമാരായ ഷെഫാലി വർമ്മയും സ്മൃതി മന്ഥാനയും വെടിക്കെട്ട് ബാറ്റിംഗാണ് കാഴ്‌ച്ചവച്ചത്. മുപ്പത് പന്തുകളിൽ ഏഴു ബൗണ്ടറികളുടേയും അഞ്ച് സിക്സറുകളുടേയും അകമ്പടിയോടെ ഷെഫാലി അറുപത് റൺസ് നേടി. സ്കോർ 96 ൽ നിൽക്കെ ഷെഫാലി പുറത്തായെങ്കിലും പതിനൊന്നാം ഓവറിൽ തുടരെ മൂന്ന് ബൗണ്ടറികൾ നേടി സ്മൃതി മന്ഥാന ഇന്ത്യയെ വിജയത്തിലേക്ക് നയിച്ചു. സ്മൃതി 28 പന്തുകളിൽ 9 ബൗണ്ടറികളോടെ 48 റൺസ് നേടി.
ആദ്യ രണ്ടു മത്സരങ്ങൾ ജയിച്ച ദക്ഷിണാഫ്രിക്ക ടി20 പരമ്പര 2-1 ന് സ്വന്തമാക്കി.
