ന്യൂഡൽഹി: അദ്ധ്യാപക ദിനത്തോടനുബന്ധിച്ച് ശ്രേഷ്ഠരായ 44 അദ്ധ്യാപകരെ രാഷ്ട്രപതി രാംനാഥ് കോവിന്ദ് ഇന്ന് ആദരിക്കും. കേന്ദ്ര വിദ്യാഭ്യാസ മന്ത്രാലയത്തിലെ ജോയിന്റ് സെക്രട്ടറി ആർ സി മീണയാണ് ഇക്കാര്യം അറിയിച്ചത്. കൊറോണയുടെ പഞ്ചാത്തലത്തിൽ വിർച്വലായാണ് ചടങ്ങ് സംഘടിപ്പിച്ചിരിക്കുന്നത്.
‘വിദ്യാഭ്യാസ മേഖലയിൽ ശ്രദ്ധേയമായ പ്രവർത്തനം നടത്തിയ 44 അദ്ധ്യാപകരെ ദേശീയ അദ്ധ്യാപക അവാർഡ് നൽകി ആദരിക്കും. അതത് മേഖലകളിലെ ജൂറിയാണ് തിരഞ്ഞെടുപ്പ് നടത്തിയത്,’ മീണ വ്യക്തമാക്കി
ദേശീയ അദ്ധ്യാപക അവാർഡിനുള്ള തിരഞ്ഞെടുപ്പ് ജില്ലാ തലത്തിലാണ് ആരംഭിക്കുന്നത്. തുടർന്ന് സംസ്ഥാന തലത്തിലും, ദേശീയ തലത്തിലും യോഗ്യരായ അദ്ധ്യാപകരെ തിരഞ്ഞെടുക്കുകയും, തിരഞ്ഞെടുത്ത എല്ലാ അദ്ധ്യാപകർക്കും അദ്ധ്യാപക ദിനത്തിൽ അവാർഡ് നൽകുകയും ചെയ്യും.
വിദ്യാഭ്യാസ മന്ത്രാലയത്തിന് കീഴിൽ സെപ്റ്റംബർ 17 വരെ നീണ്ടു നിൽക്കുന്ന ശിക്ഷക് പർവ്-2021 ന്റെ തുടക്കവും ഇതോടൊപ്പം ആരംഭിക്കും.
രാജ്യത്തെ ആദ്യ ഉപരാഷ്ട്രപതിയും, രണ്ടാമത്തെ പ്രസിഡന്റുമായിരുന്ന ഡോ. സർവേപ്പള്ളി രാധാകൃഷ്ണന്റെ ജന്മദിനത്തിലാണ് എല്ലാ വർഷവും അദ്ധ്യാപക ദിനം ആചരിക്കുന്നത്. 1962 ലാണ് ആദ്യമായി അദ്ധ്യാപക ദിനം ആചരിച്ചത്.
