ഡൽഹി: പ്രധാനമന്ത്രി നരേന്ദ്ര മോദി പ്രഖ്യാപിച്ച 100 ലക്ഷം കോടിയുടെ ‘പ്രധാനമന്ത്രി ഗതി ശക്തി മാസ്റ്റർ പ്ലാൻ’ കേന്ദ്ര മന്ത്രിസഭ അംഗീകരിച്ചു. കേന്ദ്രമന്ത്രി അനുരാഗ് താക്കൂർ ആണ് ഇക്കാര്യം അറിയിച്ചത്. നരേന്ദ്രമോദി ഒക്ടോബർ 13ന് ആണ് പ്രധാനമന്ത്രി ഗതിശക്തി പ്രഖ്യാപിച്ചത്. രാജ്യത്തെ അടിസ്ഥാന സൗകര്യ വികസനം ത്വരിതപ്പെടുത്താനും മൾട്ടി മോഡൽ കണക്റ്റിവിറ്റി വിപുലമാക്കുകയുമാണ് പദ്ധതിയുടെ ലക്ഷ്യം.
100 ലക്ഷം കോടി രൂപയുടെ ഗതി ശക്തി പദ്ധതി ഇൻഫ്രാ കണക്ടിവിറ്റി പദ്ധതികളുടെ സംയോജിത ആസൂത്രണത്തിനും ഏകോപിതമായ നടപ്പാക്കലിനുമായി 16 കേന്ദ്ര മന്ത്രാലയങ്ങളുടെയും വകുപ്പുകളുടെയും നിലവിലുള്ളതും ആസൂത്രിതവുമായ എല്ലാ അടിസ്ഥാന സൗകര്യ സംരംഭങ്ങളും ഉൾക്കൊള്ളുന്ന ഒരു കേന്ദ്രീകൃത പോർട്ടൽ വിഭാവനം ചെയ്യുന്നു.
75 -ആം സ്വാതന്ത്ര്യദിനത്തോടനുബന്ധിച്ച് ഓഗസ്റ്റ് 15ന് ചെങ്കോട്ടയിലാണ് പ്രധാനമന്ത്രി പദ്ധതി ആദ്യം പ്രഖ്യാപിച്ചത്. അടിസ്ഥാന സൗകര്യ വികസനവുമായി ബന്ധപ്പെട്ട് ഉദ്യോഗസ്ഥ തലത്തിലുള്ള തടസ്സങ്ങൾ അവസാനിപ്പിക്കാനും വിവിധ മന്ത്രാലയങ്ങൾക്കിടയിലെ കാലതാമസം ഒഴിവാക്കാനുമാണ് പദ്ധതി ലക്ഷ്യമിടുന്നത്.
നിലവിൽ ഗതി ശക്തി മാസ്റ്റർ പ്ലാൻ പ്രകാരം 16 നിർണായക മന്ത്രാലയങ്ങൾ ഈ സംരംഭത്തിന്റെ ഭാഗമാകും. റെയിൽവേ, റോഡുകൾ, ഹൈവേകൾ, പെട്രോളിയം ,ഗ്യാസ്, ടെലികോം, വൈദ്യുതി, കപ്പൽ, വ്യോമയാനം എന്നീ മേഖലകൾ ഗതിശക്തിയുടെ പരിധിയിൽ കൊണ്ടുവരും.
