തിരുവനന്തപുരം : ആരോഗ്യ സർവ്വകലാശാല എംബിബിഎസ് പരീക്ഷയിൽ ഒന്നാം റാങ്ക് നേടിയ തിളക്കത്തിലായിരുന്ന റോസിന് ഇരട്ടിമധുരം ലഭിച്ചതിന്റെ സന്തോഷമാണിപ്പോൾ. റോസിനെ നടൻ മോഹൻ ലാൽ നേരിട്ട് ഫോണിൽ വിളിച്ച് അഭിനന്ദിച്ചു.
കുഞ്ഞുനാൾ തൊട്ട് താൻ ഏറെ ആരാധിക്കുന്ന പ്രിയ നടൻ നേരിട്ട് ഫോൺ വിളിച്ച് അഭിനന്ദിച്ചതിന്റെ ഞെട്ടൽ ഇപ്പോഴും റോസിന് മാറിയിട്ടില്ല.തന്റെ പഠനത്തെക്കുറിച്ചും ജീവിതത്തെക്കുറിച്ചും ഉള്ള സ്വപ്നങ്ങളെല്ലാം സാക്ഷാൽ മോഹൻ ലാലിനോട് സംസാരിക്കാനായതിന്റെ സന്തോഷമാണ് റോസിന്.
മോഹൻലാലിന്റെ അഭ്യുദയകാംക്ഷികളുടെയും ആരാധാകരുടെയും നേതൃത്വത്തിൽ ആരോഗ്യരംഗത്ത് പ്രവർത്തിക്കുന്ന മെഡിക്കൽ വിദ്യാർത്ഥികളുടെ സേവനസംഘടനയായ നിർണയത്തെ കുറിച്ചും ലാൽ റോസിനോട് സംസാരിച്ചു. നേരിട്ട് കാണാമെന്ന് പറഞ്ഞാണ് മോഹൻലാൽ സംഭാഷണം അവസാനിപ്പിച്ചത്.
പാലക്കാട് ഒറ്റപ്പാലം പി കെ ദാസ് മെഡിക്കൽ കോളജിലെ വിദ്യാർത്ഥിനിയാണ് ക്രിസറ്റി റോസ് എന്ന റോസ്. ജീവിതത്തിൽ പെട്ടെന്നുണ്ടായ പല തിരിച്ചടികളോടും പടവെട്ടിയാണ് റോസ് ഒന്നാം റാങ്കെന്ന സ്വപ്ന നേട്ടം സ്വന്തമാക്കിയത്. ചങ്ങനാശ്ശേരി സ്വദേശിയായ അഭിഭാഷകൻ ജോസിയുടെയും വെണ്ണിക്കുളം ഗവൺമെന്റ് പോളിടെക്നിക് പ്രിൻസിപ്പിലായിരുന്ന ജൈനമ്മ ജോസിയുടേയും മകളാണ്. അമ്മ 2009ലും അച്ഛൻ 2016ലും മരിച്ചു. പിന്നീട് അമ്മയുടെയും അച്ഛന്റെയും ബന്ധുക്കളും മറ്റുള്ളവരുടേയും സഹായത്തോടെയാണ് റോസ് പഠിച്ചത്.
