ലഖ്‌നൗ: രാഷ്‌ട്രീയപ്രീണനമില്ലാതെ സംസ്ഥാനത്തെ മുഴുവന്‍ ജനങ്ങള്‍ക്കും ഐശ്വര്യവും സുരക്ഷയും ഒരുക്കുകയാണ് ബിജെപി സര്‍ക്കാര്‍ ലക്ഷ്യമിടുന്നതെന്ന് യുപി മുഖ്യമന്ത്രി യോഗി ആദിത്യനാഥ്. അഖിലേഷ് യാദവ് വിശിഷ്ട വ്യക്തിയാണെന്നും അതുകൊണ്ട് യുപിയില്‍ നടപ്പാക്കിയ ക്ഷേമപ്രവര്‍ത്തനങ്ങളോ വാക്‌സിനേഷനോ സംബന്ധിച്ച ഒരറിവും അഖിലേഷിന് അറിയില്ലെന്നും അദ്ദേഹം പറഞ്ഞു.
ദിവസം 12 മണിക്കൂര്‍ ഉറങ്ങുകയും ആറ് മണിക്കൂര്‍ സുഹൃത്തുക്കളുമായി കൂട്ടുകൂടുകയും ചെയ്യുന്നയാള്‍ക്ക് എങ്ങനെ ഇതിനെക്കുറിച്ചൊക്കെ അറിവുണ്ടാവുമെന്നും അദ്ദേഹം അഖിലേഷ് യാദവിനെ പരിഹസിച്ചു. തന്റെ സ്ഥാനത്തിന് ഭീഷണിയാവുമെന്ന് ഭയന്ന് അസംഖാന്‍ ജയില്‍മോചിതനാവുന്നത് അഖിലേഷിന് ഇഷ്ടമല്ലെന്നും അദ്ദേഹം കൂട്ടിച്ചേര്‍ത്തു.
യുപി തിരഞ്ഞെടുപ്പില്‍ സമ്പൂര്‍ണഭൂരിപക്ഷത്തോടെ ബിജെപി ജയിച്ചുവരും. ബിജെപി അധികാരത്തില്‍ എത്തുന്നതിനു മുന്‍പ് മൂന്നു നാല് ദിവസം കൂടുമ്പോള്‍ കലാപത്തിന് സാക്ഷ്യം വഹിക്കും. നിരോധനാജ്ഞ പതിവാണ്. അത് ഒരു മാസത്തോളം നീണ്ടുനില്‍ക്കും.
കഴിഞ്ഞ അഞ്ച് വര്‍ഷക്കാലമായി കലാപമില്ല, കര്‍ഫ്യൂവില്ല, സ്ത്രീകളും വ്യാപാരികളും കൊലചെയ്യപ്പെടുന്നില്ല. കന്‍വാര്‍ യാത്രകള്‍ സുഖമമായി നടക്കുന്നു. അത് മതത്തോടുളള ബഹുമാനം കൊണ്ട് മാത്രമല്ല, ജനങ്ങള്‍ക്ക് ലഭിക്കുന്ന സുരക്ഷയുടെ അടയാളമാണെന്നും അദ്ദേഹം പറഞ്ഞു. വികസനമില്ലെന്നും ക്രമസമാധാന നിലതകര്‍ന്നുവെന്നുമുള്ള പ്രതിപക്ഷത്തിന്റെ ആരോപണത്തിന് മറുപടി പറയുകയായിരുന്നു അദ്ദേഹം.
നേരത്തെ യുപിയിലെ രാഷ്‌ട്രീയം മതത്തിനും ജാതിക്കും കുടുംബത്തിനു ചുറ്റുംവട്ടം കറങ്ങിയിരുന്നു. ഇന്നാവട്ടെ വികസനം, സദ്ഭരണം, ഗരീബ് കല്യാണ്‍, ഗ്രാമങ്ങള്‍, സ്ത്രീ സുരക്ഷ, കൃഷിക്കാര്‍, യുവാക്കള്‍ എന്നിവയാണ് സര്‍ക്കാരിന്റെ അജണ്ടയെന്നും യോഗി പറഞ്ഞു.
