കൊച്ചി ; ഹിജാബ് നിരോധിച്ചുകൊണ്ടുള്ള കർണാടക ഹൈക്കോടതി വിധി ബിജെപി സ്വാഗതം ചെയ്യുന്നുവെന്ന് ദേശീയ നിർവ്വാഹക സമിതി അംഗം പി കെ കൃഷ്ണദാസ്. വർഗീയ വിഷയങ്ങൾ ഉയർത്തി രാജ്യത്ത് കലാപം ഉണ്ടാക്കാനുള്ള പോപ്പുലർ ഫ്രണ്ടിന്റെയും എസ്ഡിപിഐയുടെയും നീക്കങ്ങൾക്കേറ്റ കനത്ത തിരിച്ചടിയാണ് വിധി. തീവ്രവാദ മതമൗലികവാദ സംഘടനകൾക്ക് ഐക്യദാർഡ്യം പ്രഖ്യാപിച്ച സി.പി.എമ്മിനും കോൺഗ്രസിനുമേറ്റ തിരിച്ചടി കൂടിയാണിതെന്ന് അദ്ദേഹം പറഞ്ഞു.
കർണാടക ഹൈക്കോടതി വിധിയുടെ അന്തസത്ത ഉൾക്കൊണ്ട് കേരളത്തിലെ സ്‌കൂളുകളിലും ഏകീകൃത യൂണിഫോം നടപ്പിലാക്കാൻ സർക്കാർ തയ്യാറാകണം. മാർക്‌സിസ്റ്റ് പാർട്ടി മുത്തലാഖിലും ഹിജാബ് വിഷയത്തിലും താലിബാൻ നിലപാടാണ് സ്വീകരിച്ചത്. ഹിജാബ് വിഷയം ഉയർത്തി ആഭ്യന്തര സുരക്ഷയെ വരെ അട്ടിമറിക്കാനാണ് ഇവർ ശ്രമിച്ചത്.
രാജ്യ വിരുദ്ധ സംഘടനകൾ നടത്തുന്ന പ്രചരണത്തിന് മുഖ്യമന്ത്രിയും പ്രതിപക്ഷ നേതാവും പിന്തുണ നൽകിയത് ഗൗരവമുള്ള വിഷയമാണ്. ഇനി കോടതി വിധിയിൽ ഇവരുടെ നിലപാട് എന്ത് എന്ന് വ്യക്തമാക്കണമെന്ന് പികെ കൃഷ്ണദാസ് ആവശ്യപ്പെട്ടു. മതം നോക്കിയാണ് ഹിജാബ് വിഷയത്തിൽ സി.പി.എം നിലപാടെടുത്തത്. എന്നാൽ ശബരിമല വിഷയത്തിൽ വിരുദ്ധമായ നിലപാടാണ് സ്വീകരിച്ചത് എന്നും അദ്ദേഹം കൂട്ടിച്ചേർത്തു.
