കണ്ണൂര്: സിപിഎം പാര്ട്ടി കോണ്ഗ്രസിന്റെ സെമിനാറില് മുതിര്ന്ന കോണ്ഗ്രസ് നേതാവ് കെ.വി.തോമസ് പങ്കെടുക്കുമോ എന്നതില് തീരുമാനം ഇന്ന്. രാവിലെ 11ന് കൊച്ചിയിലെ വസതിയില് വച്ച് മാദ്ധ്യമങ്ങളെ കാണുമെന്ന് അദ്ദേഹം അറിയിച്ചിട്ടുണ്ട്. എഐസിസി വിലക്ക് ലംഘിച്ച് സിപിഎമ്മിന്റെ സെമിനാറില് പങ്കെടുത്താല് പാര്ട്ടിക്ക് പുറത്ത് പോകേണ്ടി വരുമെന്ന താക്കീതാണ് കെപിസിസി നേതൃത്വം നല്കിയിരിക്കുന്നത്.
അതേസമയം സിപിഎം സെമിനാറില് പങ്കെടുത്തതിന്റെ പേരില് പുറത്തായാലും തോമസിന് രാഷ്ട്രീയ അഭയം നല്കുമെന്ന സൂചനയാണ് പൊളിറ്റ് ബ്യൂറോ അംഗം എം.എ.ബേബി നല്കുന്നത്. സിപിഎമ്മുമായി സഹകരിക്കുന്നവര്ക്ക് അര്ഹമായ പരിഗണന നല്കുന്നതാണ് ചരിത്രം. കെ.വി.തോമസിന്റെ കാര്യത്തില് ഇക്കാര്യങ്ങള് വരാനിരിക്കുന്നതേ ഉള്ളു. സെമിനാറില് പങ്കെടുത്താല് കെ.വി.തോമസിന് ദു:ഖിക്കേണ്ടി വരില്ലെന്നും എം.എ.ബേബി പറഞ്ഞു.
പാര്ട്ടി കോണ്ഗ്രസില് പങ്കെടുത്തത് കൊണ്ട് കോണ്ഗ്രസില് നിന്ന് പുറത്താക്കപ്പെട്ടാല് കെ.വി.തോമസ് വഴിയാധാരമാകില്ലെന്ന് സിപിഎം കണ്ണൂര് ജില്ലാ സെക്രട്ടറി എം.വി.ജയരാജന് പറഞ്ഞു. പാര്ട്ടി സെമിനാറിലേക്കാണ് അദ്ദേഹത്തെ ക്ഷണിച്ചത്. ബാക്കി കാര്യങ്ങള് പറയേണ്ടത് അദ്ദേഹമാണ്. നെഹ്റുവിന്റെ പാരമ്പര്യം ഉയര്ത്തിപ്പിടിക്കുന്ന കോണ്ഗ്രസുകാര് കെ.വി.തോമസ് ഈ സെമിനാറില് പങ്കെടുക്കണമെന്നാണ് ആഗ്രഹിക്കുന്നത്. കേന്ദ്ര-സംസ്ഥാന ബന്ധങ്ങള് സംബന്ധിച്ച സെമിനാറിലേക്കാണ് കെ.വി.തോമസിനെ ക്ഷണിച്ചിരിക്കുന്നതെന്നും ജയരാജന് പറഞ്ഞു.
കെ.വി.തോമസ് സിപിഎം പരിപാടിയില് പങ്കെടുക്കരുതെന്ന് പറഞ്ഞ കെ.സുധാകരനെതിരെ ഇ.പി.ജയരാജന് രൂക്ഷവിമര്ശനം ഉന്നയിച്ചിട്ടുണ്ട്. എന്നെ വെടിവച്ചു കൊല്ലാന് ആളെക്കൂട്ടി പോയവനാണ് തോമസിനെ വിലക്കിയതെന്ന് ജയരാജന് പരിഹസിച്ചു. മറ്റ് പാര്ട്ടികളിലെ പല നേതാക്കളും സിപിഎമ്മിലേക്ക് വരുന്ന കാലമാണ്. തോമസ് പാര്ട്ടി പരിപാടിയില് വരുമോ എന്നത് കാത്തിരുന്ന് കാണാമെന്നും ജയരാജന് പറയുന്നു.
Comments